کراچی میں کارساز کے قریب تیز رفتار لینڈ کروزر نے باپ بیٹی سمیت 6 افراد کو کچل ڈالا۔ خوفناک حادثے میں خاتون ڈرائیور نے پہلے دو موٹر سائیکلوں کو بری طرح روندا۔ پھر ایک گاڑی کو بھی ٹکر مار دی۔ حادثے میں 4 افراد زخمی بھی ہوئے۔
تفصیلات کے مطابق کارساز کے قریب سروس روڈ پر تیز رفتار لینڈ کروزر نے دو موٹر سائیکلوں پر چڑھ دوڑی۔ ایک گاڑی کو بھی ٹکر ماری اور پھر الٹ گئی۔ پولیس نے کار سوار نتاشا کو گرفتار کرلیا۔ رات گئے بہادرآباد تھانے میں واقعہ کا مقدمہ درج کرلیا گیا۔ جس میں قتل بالسبب اور لاپرواہی سے ڈرائیونگ کی دفعات شامل ہیں۔
حادثے میں اسکیم 33 کے رہائشی 60 سالہ عمران عارف اور ان کی بیٹی 22 سالہ آمنہ جاں بحق ہوگئیں۔ عمران عارف بیٹی کو دفتر سے گھر لے کر جارہے تھے۔ زخمی ہونے والے چار افراد جناح اسپتال میں زیر علاج ہیں۔
لینڈ کروزر نتاشا دانش نامی خاتون چلا رہی تھی، پولیس کے مطابق خاتون مقامی ٹیکسٹائل ملز چیئرمین کی بیٹی ہے۔ حادثے کے بعد شہریوں نے خاتون کو پکڑ کر پولیس کے حوالے کیا۔ پولیس کے مطابق خاتون کا ذہنی توازن ٹھیک نہیں لگتا، نشہ کرتی ہے یا نہیں میڈیکل میں واضح ہوجائے گا۔ خاتون کے پاس سے برطانیہ کا ڈرائیونگ لائسنس ملا ہے۔
