پاکستان شوبز انڈسٹری کے اداکار منیب بٹ نے اپنی اہلیہ اور معروف اداکارہ ایمن خان کی انڈسٹری میں واپسی بارے تفصیلات بتا دیں۔
منیب بٹ اور ایمن خان کا شمار پاکستانی ڈرامہ انڈسٹری کی کامیاب جوڑیوں میں ہوتا ہے، ایمن خان نے بطور چائلڈ آرٹسٹ اپنے کیرئیر کا آغاز کیا اور بعدازاں ڈرامہ انڈسٹری کی بہترین اداکاراؤں میں سے ایک اداکارہ بن گئیں۔
ایمن خان پاکستان میں فوٹو اینڈ ویڈیو شیئرنگ پلیٹ فارم انسٹاگرام پر سب سے زیادہ فالو کی جانے والی معروف شخصیات میں سے ایک بھی ہیں۔
اداکارہ نے 2018 میں منیب بٹ سے شادی کی اور بعدازاں اپنی پہلی بیٹی کی پیدائش کے بعد شوبز مصروفیات سے بریک لے لی، لیکن، ان کے مداح ان کی انڈسٹری میں واپسی کے منتظر ہیں اور جاننا چاہتے ہیں کہ وہ کب واپسی کریں گی۔
حال ہی میں منیب بٹ نے نجی ٹی وی کے ایک پروگرام میں شرکت کی جہاں انہوں نے اپنی اہلیہ کی انڈسٹری میں واپسی بارے گفتگو کی۔
منیب بٹ نے انکشاف کیا کہ انڈسٹری میں مزید پروجیکٹ سائن نہ کرنا ایمن کا اپنا فیصلہ تھا اور وہ جب محسوس کریں گی واپس آجائیں گی۔
انہوں نے مزید کہا کہ میرا اپنی اہلیہ کے پروفیشنلز فیصلوں سے کوئی لینا دینا نہیں اور نہ ہی کبھی میں ان پر اس حوالے سے کچھ کرنے کا دباؤ ڈالا ہے، وہ اپنی مرضی سے ہی سکرین پر واپسی کریں گی۔
