پاکستان کرکٹ ٹیم کے سابق کپتان اور سوئنگ کے سلطان وسیم اکرم نے انٹرنیشنل کرکٹ کونسل ( آئی سی سی ) چیمپینز ٹرافی کے لیے بھارتی کرکٹ ٹیم کے پاکستان آنے کی امید ظاہر کردی۔
اپنے حالیہ بیان میں قومی ٹیم کے سابق کپتان وسیم اکرم کا کہنا تھا کہ پورا پاکستان بھارتی ٹیم کا منتظر ہے، مجھے امید ہے کہ بھارتی کرکٹ ٹیم چیمپینز ٹرافی کے لیے پاکستان آئے گی۔
سابق کپتان کا کہنا تھا کہ تمام ٹیموں کا شاندار استقبال ہوگا اور چیمپینز ٹرافی میں کرکٹ بھی بہت اچھی ہوگی۔
وسیم اکرم کا کہنا تھا کہ چیمپینز ٹرافی کے لیے سہولیات بہت اچھی ہیں اچھے سٹیڈیم تیار ہو رہے ہیں اور چیئرمین پی سی بی محسن نقوی نے سٹیڈیمز کی تعمیر کا اغاز کر دیا ہے۔
ان کا کہنا تھا کہ میں سمجھتا ہوں کہ یہ ایک بڑا اچھا ٹورنامنٹ ہوگا اور پاکستان کے لیے یہ ٹورنامنٹ کرکٹ کی بہتری کے لیے بہت ضروری ہے، مجھے امید ہے کہ تمام ٹیمیں چیمپینز ٹرافی کے لیے پاکستان کا دورہ کریں گی۔
انہوں نے کہا کہ کرکٹ اور سیاست کو الگ الگ رکھنا چاہیے۔
انہوں نے مزید کہا کہ میں تمام ٹیمز، فینز اور میڈیا کے نمائندوں سے کہوں گا کہ وہ آئیں اور دیکھیں کہ یہاں کتنی اچھی سہولیات ہیں۔
