اسلام آباد میں بلدیاتی انتخابات سے متعلق کیس میں بڑی پیشرفت سامنے آگئی۔ الیکشن کمیشن نے 29 ستمبر کو اسلام آباد میں بلدیاتی انتخابات کرانے کی یقین دہانی کرا دی۔
جسٹس محسن اختر کیانی نے اسلام آباد میں بلدیاتی انتخابات سے متعلق کیس کی سماعت کی۔ الیکشن کمیشن کے وکیل نے موقف اختیار کیا کہ انتخابات کے لیے الیکشن ایکٹ میں ترمیم بھی ضروری ہے۔ مخصوص نشستوں سے متعلق معاملات ابھی واضح نہیں ہیں۔
عدالت نے قرار دیا کہ کیس کی سماعت چھٹیوں کے بعد ہوگی۔ اگر کوئی مسئلہ ہوتا ہے تو سی ایم دائر کردی جائے۔ عدالت نے ایم سی آئی کی آمدن اور اخراجات کی مکمل رپورٹ بھی طلب کرلی۔
عدالت نے کہا کہ فریقین تفصیلی شق وار جواب عدالت میں جمع کرائیں۔ تمام متعلقہ درخواستوں کو یکجا کردیا گیا۔ عدالت نے الیکشن کمیشن کا اسٹیٹس پوچھا تو وکیل نے بتایا کہ چار مہینے کا پراسیس ہے۔ الیکشن کمیشن کی جانب سے 29 ستمبر کو اسلام آباد میں بلدیاتی انتخابات کی یقین دہانی پر عدالت نے سماعت پندرہ اکتوبر تک ملتوی کردی۔
