پاکستان کی معروف اور سینئر اداکارہ جویریہ عباس نے آخر کار شادی کی تصدیق کرتے ہوئے کہاہے کہ ’ ان کی شادی کو تین ماہ کا عرصہ گزر چکا ہے ‘ ۔
تفصیلات کے مطابق جویریہ عباسی نے حال ہی میں سما ٹی وی کے مارننگ شو میں شرکت کی، جہاں انہوں نے شوبز کیریئر سمیت اداکار شہود علوی سے اپنی دوستی سے متعلق بھی کھل کر بات کی۔پروگرام میں شادی کے معاملے پر بات کرتے ہوئے انہوں نے اعتراف کیا کہ انہوں نے نکاح کرلیا اور اب وہ شوہر کے ہمراہ زندگی گزار رہی ہیں۔
اداکارہ کے مطابق ان کے شوہر کاروباری شخصیت ہیں اور ان کا شوبز سے کوئی تعلق نہیں۔انہوں نے بتایا کہ انہوں نے تین ماہ قبل نکاح کیا تھا، شادی کے بعد ان کی زندگی پرسکون گزر رہی ہیں۔ایک سوال کے جواب میں جویریہ عباسی نے بتایا کہ بیٹی عنزیلہ عباسی نے ہی انہیں شوہر سے شادی کا مشورہ دیا تھا۔
اداکارہ کے مطابق انہیں اپنے سب سے قریبی دوست شہود علوی سمیت اہل خانہ نے بھی شادی کرنے کا مشورہ دیا اور انہوں نے سب کی رضامندی سے نئی زندگی شروع کی۔ایک اور سوال کے جواب میں جویریہ عباسی نے بتایا کہ انہوں نے شادی کرنے میں اس لیے تاخیر کی، کیوں کہ پہلے ان پر زیادہ ذمہ داریاں تھیں۔
انہوں نے بتایا کہ پہلے ان کی والدہ اور پھر والد علیل رہے جب کہ ان کی بہن انوشے عباسی سمیت ایک اور بہن اور بھائی بھی تاحال غیر شادی شدہ ہیں، اس لیے بھی انہون نے شادی کرنے میں تاخیر کی۔انہوں نے بتایا کہ ان کے اور شوہر کے درمیان کچھ عرصہ قبل تعلقات استوار ہوئے تھے، دونوں ایک تقریب میں ملے تھے، جس کے بعد شوہر نے انہیں شادی کی پیش کش کردی تھی لیکن وہ اس وقت تک شادی کے لیے تیار نہ تھیں۔اداکارہ کا کہنا تھا کہ شادی کی کوئی عمر نہیں ہوتی اور وہ تو ابھی جوان تھی، اس لیے انہوں نے شادی کی۔
خیال رہے کہ مئی میں جویریہ عباسی نے فرانس کے دارالحکومت پیرس کے ایفل ٹاور سے انگوٹھی پہننے کی تصویر شیئر کرتے ہوئے نئی زندگی کی شروعات کا عندیہ دیا تھا اور اب انہوں نے شادی کی تصدیق کردی۔جویریہ عباسی کی پہلی شادی ڈیڑھ دہائی قبل طلاق پر ختم ہوئی تھی۔
جویریہ عباسی نے پہلی شادی اداکار شمعون عباسی سے نوجوانی میں 1997 میں کی تھی، تاہم دونوں نے 2007 میں علیحدگی اختیار کرلی تھی۔ دونوں کے ہاں شادی کے دو سال بعد بیٹی عنزیلہ عباسی کی پیدائش ہوئی تھی۔
بیٹی کی شادی کے ایک سال بعد اب جویریہ عباسی نے بھی نئی زندگی کی شروعات کردی جب کہ شمعون عباسی پہلے ہی تیسری شادی کر چکے ہیں۔
