لیجنڈز ورلڈ چیمپئن شپ 2024 کے میچ میں پاکستان چیمپئنز نے یونس خان کی شاندار بیٹنگ کی بدولت آسٹریلیا چیمپئنز کو 5 وکٹوں سے شکست دے دی۔
پاکستان چیمپئنز اور آسٹریلیا چیمپئنز کی ٹیمیں لیجنڈز ورلڈ چیمپئن شپ 2024 کے دوسرے میچ میں برمنگھم میں مدمقابل تھیں جہاں پاکستانی ٹیم نے ٹاس جیت کر پہلے باؤلنگ کا فیصلہ اور آسٹریلوی ٹیم کو بیٹنگ کی دعوت دی۔
آسٹریلوی ٹیم نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 189 رنز بنائے۔
کینگروز کی جانب سے ایرن فنچ 40 گیندوں پر 68 رنز بنا کر نمایاں بیٹر رہے جبکہ گرین شرٹس کی جانب سے شعیب ملک اور شاہد آفریدی نے دو، دو وکٹیں حاصل کیں۔
جواب میں پاکستان چیمپئنز نے 190 رنز کا مطلوبہ ہدف 19.4 اوورز میں 5 وکٹوں کے نقصان پر حاصل کرلیا۔
گرین شرٹس کی جانب سے کپتان یونس خان 41 گیندوں پر 63 رنز کی اننگ کھیل کر نمایاں بیٹر رہے جبکہ دیگر کھلاڑیوں میں مصباح الحق نے 30 گیندوں پر 46 رنز کی ناقابل شکست اننگ کھیلی۔
اوپنر شرجیل خان 17، کامران اکمل 4، صہیب مقصود 21، شعیب ملک 23 اور شاہد آفریدی نے 11 رنز کی اننگ کھیلی۔
آسٹریلوی ٹیم کی جانب سے کپتان بریٹ لی نے 2 وکٹیں حاصل کیں۔
