مسلم لیگ ( ن ) کے رہنما اور رکن قومی اسمبلی حنیف عباسی نے عام انتخابات میں مبینہ دھاندلی کی تحقیقات کے حوالے سے امریکی کانگریس کی قرارداد کو پاکستان تحریک انصاف ( پی ٹی آئی ) کی لابنگ کا نتیجہ قرار دے دیا۔
اسلام آباد میں میڈیا سے گفتگو کرتے ہوئے ن لیگی رہنما حنیف عباسی کا کہنا تھا کہ امریکی کانگریس کی قرارداد پی ٹی آئی کی لابنگ کا نتیجہ ہے، پی ٹی آئی نے لابنگ کے لیے لاکھوں ڈالر سرمایہ کاری کی ہے۔
حنیف عباسی کا کہنا تھا کہ پی ٹی آئی نے آئی ایم ایف کے قرض پروگرام میں بھی رکاوٹیں ڈالیں اور پاکستانی وفد کے دورے کے موقع پر آئی ایم ایف کے سامنے احتجاج بھی کیا گیا۔
لیگی رہنما کا کہنا تھا کہ عالمی ادارے پاکستانی معیشت میں بہتری کی گواہی دے رہے ہیں۔
انہوں نے سوال اٹھایا کہ امریکہ میں کرکٹ میچ کے موقع پر جو جہاز اڑائے گئے اس کے پیچھے کون تھا ؟۔
ان کا مزید کہنا تھا کہ امریکہ کے خلاف سائفر لہرانے والوں نے دوبارہ امریکی غلامی قبول کر لی ہے۔
