عید الاضحیٰ کے موقع پر پاکستانی فلمی دنیا کی چار نئی فلمیں ریلیز کی جائیں گی، جن میں سائنس فکشن فلم ’’عمرو عیار‘‘،رومانوی مزاحیہ فلم ’’نابالغ افراد ‘‘ سمیت ’’ایجنٹ انیلا اور ’’ابھی‘‘شامل ہیں۔ مذکورہ چاروں نئی فلموں کے علاوہ فلمی شائقین سینماؤں میں پرانی فلمیں جن میں دی لیجنڈ آف مولا جٹ، دغا باز دل اور پوپی کی ویڈنگ سمیت دیگر فلمیں بھی دیکھ پائیں گے۔
فلم ’ایجنٹ انیلا‘ کی کہانی قاسم گل پنہور نے لکھی ہے اور انہوں نے ہی اس کی ہدایات دی ہیں جب کہ وہ فلم کے پروڈیوسر بھی ہیں۔ فلم کی کاسٹ میں اداکارہ میرا، ردا اسفہانی، غلام محی الدین، مصطفیٰ قریشی، شفقت چیمہ، مسکان نذیر، منظور مراد، پیر معظم اور محبوب سلطان شامل ہیں جبکہ ایجنٹ انیلا‘ میں سندھی اور پشتو ڈراموں کے اداکار بھی دکھائی دیں گے۔
جاری کیے گئے ٹریلر سے فلم کی کہانی سمجھنا مشکل ہے، تاہم عندیہ ملتا ہے کہ فلم میں ایک گروہ پاکستان میں کسی وائرس کے ذریعے اموات اور خوف پھیلانا چاہتا ہے جب کہ دوسرا گروہ انہیں روکنے کی کوشش کرتا دکھائی دیتا ہے۔
فلم ’’ابھی‘‘ میں اداکارہ کبریٰ خان اور گوہر ممتاز تقریبا 6 سال بعد بڑے پردے پر واپسی کر رہے ہیں۔ ’ابھی‘ کی کاسٹ میں اداکار سلیم شیخ، عثمان پیرزادہ، محمود اسلم، احتشام الدین، حنا بیات اور آصف رضا میر سمیت دیگر شامل ہیں۔ فلم کی کہانی گوہر ممتاز نے شعیب ربانی کے ساتھ خود لکھی ہے جب کہ اس کی ہدایات اسد ملک دے رہے ہیں۔ فلم کی کہانی نہ صرف رومانوی بلکہ ٹریجڈی اور قوم پرستی کے گرد بھی گھومتی ہے۔
فلم ساز نبیل قریشی کی فلم ’’نابالغ افراد‘‘ کی کہانی 1990 کی دہائی کے گرد گھومتی ہے اور اس کے ٹریلر سے اس کی مکمل کہانی سمجھنا مشکل ہے، تاہم یہ ایک مصالحہ فلم لگ رہی ہے جو لوگوں کو محظوظ کرے گی۔فلم کی کاسٹ میں عاشر وجاہت اور ثمر جعفری سمیت رمحہ احمد سمیت دیگر اداکار شامل ہیں۔
فلم کی نصف کاسٹ نئی نسل پر مبنی ہے، جن کی عمریں 15 سے 25 سال کے درمیان ہیں جب کہ نصف کاسٹ سینیئر اداکاروں پر مبنی ہے۔ فلم میں معراج سلیم، مانی، راشدہ تبسم اور فائزہ احسن سمیت دیگر اداکار بھی ایکشن میں دکھائی دیں گے۔سائنس فکشن فلم ’’عمرو عیار‘‘کی ہدایات اظفر جعفری نے دی ہیں، اس کی کہانی عاطف ریحان صدیقی نے لکھی ہے اور اسے ہما بابر نے پروڈیوس کیا ہے۔
’عمرو عیار‘ کی کاسٹ میں عثمان مختار، صنم سعید، فاران طاہر کے علاوہ علی قاضی، عدنان صدیقی، سیمی راحیل، ثنا فخر، منظر صہبائی، دانیال راحیل اور سلمان شوکت سمیت دیگر اداکار شامل ہیں۔ ’عمرو عیار‘ فلم کی کہانی ہزار سالہ قدیم ادب ’داستان امیر حمزہ‘ میں شامل اسی نام کے کردار کی کہانی پر مبنی ہے۔
