پاکستان، قازقستان، قطر، ترکیہ اور ازبکستان کی مشترکہ فوجی مشقیں اختتام پزیر ہوگئیں۔
پاک فوج کے شعبہ تعلقات عامہ ( آئی ایس پی آر ) کے مطابق کثیرالقومی فوجی مشقیں 17 سے 30 ستمبر تک بروتھا گیریژن میں جاری رہیں، دو ہفتے تک جاری رہنے والی مشقوں میں پانچوں ممالک کی اسپیشل فورسز نے حصہ لیا۔
آئی ایس پی آر کے مطابق آخری روز مشقوں میں شریک ممالک کے فوجیوں نے پیشہ ورانہ صلاحیتوں کا مظاہرہ کیا، مشقوں کی اختتامی تقریب کے مہمان خصوصی کمانڈر 11 کور تھے، ڈی جی ملٹری ٹریننگ اور جی سی او اسپیشل سروسز گروپ نے بھی مشقیں دیکھیں۔
اختتامی تقریب میں دوست ممالک سے تعلق رکھنے والے فوجی افسران بھی موجود تھے۔
مشقوں کا مقصد برادر ممالک کے درمیان فوجی تعلقات کو مزید بہتر بنانا تھا، مشقوں سے دہشت گردی کیخلاف مشترکہ حکمت عملی تیار کرنے میں مدد ملی، آئندہ فوجی تعاون بڑھانے کیلئے باہمی دلچسپی کے شعبوں کی نشاندہی بھی ہوئی۔
