ژوب کے علاقے سمبازہ میں شہید ہونے والے میجر بابر نیازی کی نماز جنازہ ادا کر دی گئی۔ شہید کو مکمل فوجی اعزاز کے ساتھ آبائی شہر میانوالی میں سپرد خاک کیا جائے گا۔
آئی ایس پی آر کے مطابق میجر بابر نیازی کی نماز جنازہ ژوب کینٹ میں ادا کی گئی۔ اعلیٰ فوجی اور سول افسران کے ساتھ عوام نے بھی نماز جنازہ میں شرکت کی۔
میجر بابر نیازی گزشتہ روز بلوچستان کے ضلع ژوب میں دہشت گردوں کے خلاف آپریشن کے دوران شہادت کے رتبے پر فائز ہوئے تھے۔ شہید کے سوگواران میں بیوہ، 3 سالہ بیٹا اور والدین شامل ہیں۔ شہید کو مکمل فوجی اعزاز کے ساتھ آبائی شہر میں سپرد خاک کیا جائے گا۔
صدر مملکت آصف زرداری نے میجر بابر نیازی کی شہادت پر اہل خانہ سے اظہار تعزیت کی۔ شہید کی بہادری اور وطن کیلئے خدمات کو بھی سراہا ۔
صدر مملکت نے میجر بابر خان شہید کیلئے بلندی درجات اور اہل خانہ کیلئے صبر جمیل کی دعا۔ کہا شہید کی بہادری اور جذبہ حب الوطنی قابل قدر ہے ۔ صدر زرداری نے ملک سے دہشت گردی کے مکمل خاتمے کے عزم کا بھی اظہار کیا۔
وزیراعلیٰ پنجاب مریم نواز نے بھی شہید میجر بابر خان کو خراج عقیدت پیش کیا۔ سوگوار خاندان سے تعزیت بھی کی۔ اس کے علاوہ وفاقی وزیرداخلہ محسن نقوی نے بھی میجر بابر خان کے اہل خانہ سے دلی ہمدردی کا اظہار کیا۔ کہا میجر بابر نے بہادری سے لڑتے ہوئے اپنی قیمتی جان وطن پر نچھاور کی۔ شہید نے جرات کے ساتھ دہشت گردوں کو جہنم واصل کیا۔ شہید میجر بابر خان کی قربانی رائیگاں نہیں جائے گی، پوری قوم کو شہداء کی عظیم قربانیوں پر ناز ہے۔
وفاقی وزیر اور استحکام پاکستان پارٹی کے صدر عبدالعلیم خان نے بلوچستان میں شہید ہونے والے میجربابر خان کوخراج عقیدت پیش کرتے ہوئے کہا کہ انہوں نے اپنی جان دے کرمادر وطن پرآنچ نہیں آنے دی، بہادرجوانوں نے ایک مرتبہ پھرجرات اوربہادری کی داستان رقم کر دی۔
عبدالعلیم خان نے کہا کہ دہشت گردی کو جڑ سے اکھاڑنے کے لئے حکومت مکمل طور سے پرعزم ہے، وفاقی وزیرنجکاری کا کہنا تھاساری قوم پاک فوج کے ساتھ ہے اور جانیں نچھاور کرنے والوں کوسلام پیش کرتی ہے۔ انہوں نے ژوب میں سیکیورٹی اداروں کے آپریشن میں 3 دہشتگردوں کی ہلاکت پر اظہاراطمینان کرتے ہوئے کہا فوج ملک کو ایسے عناصر سے پاک کر کے دم لے گی۔
