معروف پاپ اسٹار شکیرا پر اسپین میں 71 لاکھ ڈالر ٹیکس بچانے کیلئے 2018ء میں آمدنی چھپانے کا الزام عائد کردیا گیا۔
غیر ملکی میڈیا کی رپورٹ کے مطابق بارسلونا میں ہسپانوی پراسیکیوٹر نے ایک بیان میں کہا کہ شکیرا پر الزام ہے کہ انہوں نے ٹیکس ادائیگی سے بچنے کیلئے ایک آف شور کمپنی کا استعمال کیا۔
رپورٹ کے مطابق گلوکارہ شکیرا کو میامی میں ان کے گھر پر بھیجے گئے ایک نوٹس کے ذریعے ان الزامات سے متعلق آگاہ کیا گیا۔
شکیرا پر بارسلونا میں 20 نومبر کو ایک الگ کیس میں مقدمہ چلایا جانا ہے، جہاں وہ 14-2012ء کے دوران رہتی تھیں، ان پر الزام لگایا گیا تھا کہ وہ 14.5 ملین یورو (15.4 ملین امریکی ڈالر) ٹیکس ادا کرنے میں ناکام رہیں۔
بارسلونا میں استغاثہ نے الزام لگایا ہے کہ گریمی جیتنے والی معروف گلوکارہ نے 2012-14ء کی مدت کا نصف سے زیادہ اسپین میں گزارا اور اس لئے انہیں ملک میں ٹیکس ادا کرنا چاہئے تھا حالانکہ اس کی سرکاری رہائش بہاماس میں تھی۔
ہسپانوی ٹیکس حکام نے جولائی میں شکیرا کیخلاف نیا کیس کھولا، گزشتہ 2 ماہ کے دوران جمع کئے گئے شواہد کا جائزہ لینے کے بعد استغاثہ نے گلوکارہ پر الزامات عائد کرنے کا فیصلہ کیا تاہم فی الحال مقدمے کیلئے کوئی تاریخ مقرر نہیں کی گئی۔
شکیرا کی پیروی کرنیوالی فرم نے اپنے ایک بیان میں کہا تھا کہ گلوکارہ نے ہمیشہ قانون کے مطابق اور اپنے مالیاتی مشیروں کے مشورے پر کام کیا ہے۔
اسپین کے ٹیکس حکام نے معروف فٹبال اسٹارز لیونل میسی اور کرسٹیانو رونالڈو کو بھی ٹیکس چوری کا مرتکب قرار دیا تھا، دونوں کھلاڑی ٹیکس چوری کے مرتکب پائے گئے تھے تاہم جج کو حاصل اختیارات کے باعث دونوں جیل جانے سے بچ گئے تھے۔
