کراچی کنگز کے اسسٹنٹ کوچ روی بوپارا نے کہا ہے کہ آلراؤنڈر محمد نواز کا کافی تجربہ ہے ، انہیں ایک دم سے ڈراپ نہیں کر سکتے۔
ملتان سلطانز کے ہاتھوں شکست کے بعد پریس کانفرنس کرتے ہوئے اسسٹنٹ کوچ کراچی کنگز روی بوپارا کا کہنا تھا کہ محمد نواز کو ایک دم سے ڈراپ نہیں کر سکتے، وہ کافی وقت سے پاکستان سپر لیگ ( پی ایس ایل ) کھیل رہے ہیں اور ان کا کافی تجربہ ہے۔
روی بوپارا کا کہنا تھا کہ 190 رنز کا ہدف کافی تھا ، ملتان نے اچھا کھیلا، عرفان نیازی نے اپنا کھیل کافی بہتر کیا ہے اور وہ اس وقت پاکستان کے بہترین فیلڈر ہیں۔
ان کا مزید کہنا تھا کہ کراچی کنگز کے پاس کچھ اچھے فاسٹ باؤلرز ہیں جو ان کا مستقبل ہیں۔
یاد رہے کہ اتوار کے روز کھیلے جانے والے پی ایس ایل کے 19 ویں میچ میں ملتان سلطانز نے کراچی کنگز کو 20رنز سے شکست دیتے ہوئے پلے آف مرحلے میں جگہ بنا لی ہے۔
