سربراہ پاک بحریہ ایڈمرل نوید اشرف نے کہا ہے کہ پاک بحریہ دشمن کی جانب سے کسی بھی مہم جوئی کا منہ توڑ جواب دینے کے لئے ہمہ وقت تیار ہے۔
پاک فوج کے شعبہ تعلقات عامہ( آئی ایس پی آر) سے جاری بیان کے مطابق پاک بحریہ کے سربراہ ایڈمرل نوید اشرف نے بحری مشق سی سپارک 2024 کے دوران بحری جہازوں، کوسٹل اور کریک ایریاز ارماڑہ، کیٹی بندر اور شاہ بندر میں نیول تنصیبات کادورہ کیا۔
نیول چیف نے کھلے سمندر میں پاک بحریہ کے جنگی جہازوں پر مشق کی سرگرمیوں کا جائزہ لیااور پاک بحریہ کی پیشہ وارانہ صلاحیتوں، دفاعی حکمت عملی اور جنگی تیاری پر اطمینان کا اظہار کیا ۔ انہوںنے دورے کے دوران افسران اور جوانوں کی بے لوث لگن اور عزم کو سراہا۔
مشق سی سپارک 2024 میں پاک بحریہ کے ساتھ ساتھ پاک آرمی اور پاکستان ایئر فورس کے اہلکار اور اثاثے جوائنٹ آپریشنز میں حصہ لے رہے ہیں۔25 جنوری سے جاری مشق سی سپارک کا مقصد پاک بحریہ کی جنگی حکمت عملی کا تنقیدی جائزہ لینا ہے۔
آئی ایس پی آئی کے مطابق مشق میں پاک بحریہ کے تمام جنگی اثاثوں کے ساتھ ساتھ پی ایم ایس اے، اسپیشل فورسز اور پاک میرینز بھی شامل ہیں۔
