لندن کی کریمنل کورٹ کے قریب کئی دھماکے ہوئے، لندن بھر میں دھماکوں کی آواز سنی گئی، ہر طرف دھویں کے بادل چھا گئے، پولیس اور فائر فائٹرز بھی جائے وقوعہ پر پہنچ گئے۔
غیر ملکی میڈیا کے مطابق لندن کی کرمنل کورٹ (اولڈ بیلے) کے قریب دھماکوں کے بعد کراؤن کورٹ کی عمارت کو خالی کرالیا گیا، دھماکوں کی آواز دور دور تک سنی گئی، جس سے افراتفری پھیل گئی۔
رپورٹ کے مطابق دھماکوں کے بعد ایک عمارت سے دھواں اٹھتا دیکھا گیا جبکہ علاقے پر دھویں کے کالے بادل چھاگئے، تاحال یہ نہیں پتہ چل سکا کہ دھماکوں میں کوئی جانی نقصان ہوا یا نہیں۔
رپورٹ کے مطابق دھماکے کے بعد فائر بریگیڈ کی 7 گاڑیاں اور درجنوں فائر فائٹرز جائے وقوعہ پر پہنچ گئے، عمارت میں لگی آگ پر قابو پانے کی کوششیں جاری ہیں۔
پولیس کی بھاری نفری بھی علاقے میں پہنچ گئے، واقعے سے متعلق تحقیقات شروع کردی گئیں، دھماکوں کا تعین کیا جارہا ہے۔
رپورٹ میں بتایا گیا ہے کہ دھماکوں کے بعد عدالت لائے گئے ملزمان کو وین کے ذریعے واپس جیل منتقل کردیا گیا۔
