کھانے پینے کی اشیاء کی درآمدات میں جاری مالی سال کے پہلے 6 ماہ کے دوران سالانہ بنیادوں پر 19 فیصد کی کمی ریکارڈ کی گئی۔
پاکستان بیورو برائے شماریات کے اعداد و شمارکے مطابق جولائی سے دسمبر 2023ء تک کی مدت میں اشیائے خوراک کی درآمدات پر 3 ارب 95 کروڑ 70 لاکھ ڈالر کا زرمبادلہ خرچ ہوا جو گزشتہ مالی سال کی اسی مدت کے مقابلہ میں 19 فیصد کم ہے، گزشتہ مالی سال جولائی تا دسمبر 2022ء میں اشیائے خوراک کی درآمدات پر 4 ارب 91 کروڑ 40 لاکھ ڈالر کا زرمبادلہ خرچ ہوا تھا۔
رپورٹ کے مطابق دسمبر میں اشیائے خوراک کی درآمدات کا حجم 607 ملین ڈالر ریکارڈ کیا گیا جو دسمبر 2022ء کے مقابلے میں 27 فیصد کم ہے، دسمبر 2022ء میں کھانے پینے کی اشیاء کی درآمدات کا حجم 834 ملین ڈالر رہا تھا۔
رپورٹ میں بتایا گیا ہے کہ نومبر 2023ء کے مقابلے میں دسمبر 2023ء میں اشیائے خوراک کی درآمدات میں ماہانہ بنیادوں پر 15 فیصد کی کمی ہوئی، نومبر میں کھانے پینے کی اشیاء کی درآمدات کا حجم 717 ملین ڈالر ریکارڈ کیا گیا جو دسمبر میں کم ہوکر 607 ملین ڈالر ہوگیا۔
