مسلم لیگ ( ن ) کی چیف آرگنائزر مریم نواز نے کہا ہے کہ بے قصوروں کا احتساب کرنے والے اپنے منہ چھپا کر اور اپنی جوتیاں چھوڑ کر بھاگ رہے ہیں۔
اوکاڑہ میں منعقدہ جلسے سے خطاب کرتے ہوئے لیگی چیف آرگنائزر مریم نواز کا کہنا تھا کہ آج کل انتخابی نشان کی واپسی کا شور مچا رہے ہیں ، آپ سے کسی نے کوئی نشان واپس نہیں لیا، آپ کا انتخابی نشان بلا نہیں تھا بلکہ وہ ڈنڈا تھا جو آپ نے اپنے ہاتھ میں پکڑا تھا، وہ ڈنڈا جس سے آپ نے لوگوں کی روٹیاں توڑیں، وہ ڈنڈا اب آپکے ہاتھ سے چھین لیا گیا ہے، اس ڈنڈے سے آپ نے فوجی تنصیبات پر حملے کئے تھے۔
مریم نواز نے کہا کہ کسی دہشگرد جماعت کو سیاسی جماعت کا نشان نہیں مل سکتا۔
ان کا کہنا تھا کہ قدرت کی لاٹھی ہر جگہ اپنی آواز دکھا رہی ہے، قدرت کے اصول میں معافی ہے لیکن ظالم کے لئے کوئی معافی نہیں، دوسروں کا احتساب کرتے ہوئے فرعون بنے ہوئے تھے جب اپنی باری آئی تو منہ چھپا کر اور جوتیاں چھوڑ کر بھاگ رہے ہیں۔
انہوں نے کہا کہ نواز شریف کی طرح سچا انسان شیر کی طرح ڈٹ کر کھڑا ہوتا ہے بھاگتا نہیں۔
مریم نواز کا کہنا تھا کہ ہن او سہولت کاریاں نئیں ریاں، اللہ تعالیٰ نے چن چن کر سہولت کاروں کو سزا دی ہے، ساس سے فون کر وا کر فیصلے لینے کی سہولت میسر نہیں ہے، اب فیصلے عوام کی عدالت کرے گی یا قانون کرے گا۔
