فلموں کے معروف اداکار شان شاہد نے مقبول ترین ڈرامے ’تیرے بن‘ کے پروڈیوسر عبداللہ کادوانی کو مشورہ دیا ہے کہ ڈرامے کا دوسرا سیزن بنانے کے بجائے اس کی فلم بنائی جائے تو زیادہ بہتر ہوگا۔
پاکستان ٹی وی پر نشر ہونے والے مقبول ترین ڈرامہ سیریز ’’تیرے بن‘‘ کے پروڈیوسر عبداللہ کادوانی نے اپنے ایکس (ٹوئٹر) اکاؤنٹ پر اس کا دوسرا سیزن بنانے کا اعلان کیا، جس پر شان شاہد نے کمنٹس کرتے ہوئے ڈرامے پر فلم بنانے کا مشورہ دیا۔
عبداللہ کادوانی نے اپنی مختصر ٹوئٹ میں ’تیرے بن‘ کی شوٹنگ سیٹ کی تصویر شیئر کرتے ہوئے مداحوں کو بتایا تھا کہ ان کا انتظار جلد ختم ہونے والا ہے کیونکہ عنقریب ’’تیرے بن‘‘ ڈرامے کے دوسرے سیزن کو نشر کیا جائے گا۔
عبداللہ کادوانی کی ٹوئٹ پر شان شاہد نے کمنٹس کرتے ہوئے لکھا کہ کم از کم کوئی تو دوسرا پارٹ بنا رہا ہے، لیکن میرا اب بھی خیال ہے کہ فلم بنائی جانی چاہئے۔
Atleast someone is making part 2z .. but I still think a film would do better justice to the brand
— Shaan Shahid (@mshaanshahid) December 29, 2023
شان شاہد نے مزید لکھا کہ’تیرے بن‘ برانڈ کے ساتھ اس وقت ہی انصاف ہوگا جب اس پر ڈرامے کے سیزن کے بجائے فلم بنائی جائے گی۔
واضح رہے کہ اداکار شان شاہد کے مشورے سے زیادہ تر ایکس صارفین نے بھی اتفاق کرتے ہوئے عبداللہ کادوانی سے مطالبہ کیا کہ وہ یمنیٰ زیدی اور وہاج علی کی کاسٹ پر مبنی فلم بنائیں۔
یاد رہے کہ ڈرامہ ’تیرے بن‘ دسمبر 2022 سے جولائی 2023ء تک نشر کیا گیا تھا، جس نے پاکستان سمیت دنیا بھر میں مقبولیت حاصل کی تھی، 58 اقساط پر مشتمل ڈرامہ سیریز کی مرکزی کہانی وہاج علی (مرتسم) اور یمنیٰ زیدی (میرب) کی شادی شدہ زندگی کی مشکلات کے گرد گھومتی تھی۔
