مسلم لیگ ( ن ) اور جمعیت علماء اسلام ( ف ) میں سیٹ ایڈجسمنٹ پر ڈیڈ لاک برقرار ہے ، سربراہ جے یو آئی مولانا فضل الرحمان نے خیبر پختونخوا ( کے پی کے ) میں سیٹ ایڈجسمنٹ سے قبل پنجاب سے قومی اور صوبائی اسمبلی کی نو سیٹیں مانگ لیں۔
ذرائع کے مطابق جے یو آئی رہنماؤں نے ( ن ) لیگی رہنماؤں کے ساتھ ملاقات میں پنجاب کے مختلف اضلاع سے نو سیٹوں کا مطالبہ کیا ہے تاہم نون لیگ نے باہمی گفتگو میں اس حوالے سے حتمی جواب نہیں دیا ۔
نون لیگی ذرائع نے بتایا کہ مولانا فضل الرحمان اور نواز شریف کے درمیان ملاقات کے بعد جے یوآئی کا پنجاب میں تین قومی اور چھ صوبائی اسمبلی کی سیٹوں کی ایڈجسمنٹ کا پیغام دیا گیا تھا جبکہ کے پی کے میں سیٹ ایڈجسمنٹ کے پیغام پر انہوں نے پہلے پنجاب کا فارمولا طے کرنے کا پیغام دیا تھا۔
ادھر کے پی کے میں ن لیگ کی صوبائی اور جے یو آئی کی قیادت بھی پنجاب کے فیصلے کی منتظر ہے جبکہ نواز شریف نے تاحال کسی جماعت کے ساتھ سیٹ ایڈجسمنٹ کا اشارہ نہیں دیا۔
