کراچی پولیس نے ڈرگ ڈیلر انمول عرف پنکی کو ایس آئی یو ٹی منتقل کیے جانے سے متعلق خبروں کی تردید کردی۔ محکمہ داخلہ سندھ نے پنکی کو اسپتال منتقل کئے جانے کی صورت میں سیکیورٹی کےلیےخط لکھا تھا تاہم جیل حکام کے مطابق میڈیکل ٹیمیں جیل میں ہی پنکی کا طبی معائنہ کرینگی۔
ترجمان ساؤتھ زون پولیس کے مطابق انمول عرف پنکی کو گزشتہ روز جیل میں معمولی طبی تکلیف محسوس ہوئی تھی، جس پر جیل انتظامیہ کی جانب سے باقاعدہ لیٹر جاری کیا گیا۔ جیل ڈاکٹرز نے آج انمول عرف پنکی کا تفصیلی طبی معائنہ کیا ہے اور اس کا علاج جیل میں ہی جاری ہے ۔
بیان کے مطابق انمول عرف پنکی کو کسی بھی دوسرے اسپتال، بشمول ایس آئی یو ٹی منتقل نہیں کیا جارہا جبکہ سول اور ایس آئی یو ٹی کی میڈیکل ٹیمیں جیل میں ہی پنکی کا طبی معائنہ کرینگی۔
واضح رہے کہ محکمہ داخلہ سندھ نے پنکی کو اسپتال منتقل کئے جانے کی صورت میں سیکیورٹی کےلیےخط لکھا تھا ۔ جس میں کہا گیا کہ تئیس مقدمات میں نامزد گرفتار ملزمہ انمول عرف پنکی کو فول پروف سیکیورٹی میں اسپتال لے جایا جائےگا ۔ خط کے مطابق پنکی کی جیل سے باہر نقل و حرکت کے لیے غیر معمولی سیکیورٹی انتظامات ناگزیر ہے۔
