وزیرمملکت داخلہ طلال چوہدری کا کہنا ہے کہ پی ٹی آئی اب ٹک ٹاک کی حد تک تحریک چلا رہی ہے ، اسمبلیوں سے استعفے، سول نافرمانی، آئی ایم ایف کو خط کے بعد بات ملاقات تک آگئی ہے۔
اسلام آباد میں میڈیا سے گفتگو میں طلال چوہدری نے کہا کہ یہ گھر سے نکلتے ہی ٹک ٹاک کے لیے ہیں، پولیس افسر سے بدتمیزی سے سہیل آفریدی خود بے نقاب ہوئے، پی ٹی آئی والے کارکردگی کے سوال سے بچنے کے لیے ہمدردی کارڈ کھیلتے ہیں۔
لیگی رہنما نے کہا کہ پی ٹی آئی نے 15 سال میں فوکس صوبائی حکومت کی کارکردگی پر نہیں جانےدیا، پی ٹی آئی نےصوبائی حکومت کی کارکردگی سےتوجہ ہٹا کرادھر ادھر لگائی ہوئی ہے، یہ ڈیل پیکج لے کر حکومت کے پاس آتے ہیں۔ عدالتی فیصلوں کی موجودگی میں ہم کچھ نہیں کرسکتے۔
طلال چوہدری کا کہنا تھا کہ بانی پی ٹی آئی کا غیر سیاسی رویہ ہے ، بانی پی ٹی آئی خود اپنی سیاست کا شکارہوئے، بانی پی ٹی آئی نے وکیلوں کو ادھار پر پارٹی دی ہوئی ہے، پی ٹی آئی کا احتجاج ناکام ہے۔ علیمہ خان چاہتی ہے بھائی سے کوئی حادثہ ہو اور قیادت ان کے ہاتھ میں آئے۔
وزیرمملکت داخلہ نے کہا کہ حکومت نے کبھی پی ٹی آئی کو ڈیل کی پیشکش نہیں کی، مذاکرات کے آغاز سے پہلے پی ٹی آئی کی کوئی شرط قابل قبول نہیں ہوگی، کسی خاص فرد سے متعلق بات چیت نہیں ہوگی۔
ان کا کہنا تھا کہ ٹیم ورک سے تمام پاکستان کو عزت ملی جس پر فخر ہونا چاہیے، ایران امریکا جنگ میں ثالثی عزت کے ساتھ ذمہ داری والی بات ہے، امید ہے ثالثی کی کوششوں میں اس مرتبہ کوئی بریک تھرو ہوگا۔ وزیراعظم،فیلڈمارشل کی پارٹنرشپ نے پاکستان کی عزت میں بے پناہ اضافہ کیا ہے۔
طلال چوہدری کے مطابق ون کانسٹیٹیوشن ایونیو سے متعلق قائم کمیٹی نے کافی کام مکمل کرلیا ہے، رپورٹ جلد وزیراعظم کو پیش کردی جائے گی۔
