سندھ انسداد پولیو پروگرام کے تحت کراچی میں جاری پولیو بوسٹر ڈوز مہم تیسرے روز میں داخل ہوگئی۔ پروگرام حکام کے مطابق شہر کی 89 یونین کونسلز میں اب تک 5 لاکھ 36 ہزار بچوں کو پولیو ویکسین دی جاچکی ہے۔
انسداد پولیو پروگرام کا کہنا ہے کہ والدین کا تعاون مہم کی کامیابی میں کلیدی کردار ادا کر رہا ہے جبکہ پولیو ٹیمیں اسکولوں، محلوں اور مختلف کمیونٹی مقامات پر بچوں کو ویکسین فراہم کر رہی ہیں۔
حکام کے مطابق اسٹریٹ چلڈرن اور محروم آبادی تک بھی پولیو ٹیموں کی رسائی جاری ہے تاکہ کوئی بچہ ویکسین سے محروم نہ رہے۔
سندھ انسداد پولیو پروگرام کے مطابق بوسٹر ڈوز مہم انسداد پولیو حکمت عملی کا اہم حصہ ہے اور ہائی رسک علاقوں میں بچوں کی قوت مدافعت مضبوط بنانے کے لیے خصوصی توجہ دی جا رہی ہے۔
حکام نے بتایا کہ بوسٹر ڈوز World Health Organization کی سفارشات کے مطابق دی جا رہی ہے جبکہ Lahore میں بھی بچوں کو بوسٹر ڈوز دی جاچکی ہے۔
انسداد پولیو پروگرام نے والدین سے اپیل کی ہے کہ وہ افواہوں اور غلط معلومات کو مسترد کرتے ہوئے اپنے بچوں کو پولیو سے بچاؤ کے قطرے ضرور پلوائیں۔ پروگرام کے مطابق کراچی کی 89 یونین کونسلز میں یہ مہم 24 مئی تک جاری رہے گی۔
