ایرانی پارلیمان کے ڈپٹی اسپیکر علی نیکزاد کا کہنا ہے کہ آبنائے ہرمز کی پوزیشن دوبارہ کبھی پہلی جیسی نہیں ہوگی، ایک بات یقینی ہے کہ ہم آبنائے ہرمز سے پیچھے نہیں ہٹیں گے۔
میڈیا سے گفتگو میں ایرانی پارلیمان کے ڈپٹی اسپیکر علی نیکزاد نے کہا کہ ہرمز صوبے کے حکام اور وہاں تعینات فورسز کو ٹاسک دیا جاچکا ہے، امریکا ہرمز کھلوانے میں ناکام رہا، ناکہ بندی بھی کامیاب نہیں ہوگی۔
علی نیکزاد کا مزید کہنا تھا کہ اسرائیل کے بحری جہاز کبھی آبنائے ہرمز سے نہیں گزر سکیں گے، امریکا اور اس کے اتحادی جارح ممالک کو بھی پابندیوں کا سامنا ہوگا، باقی ممالک کے جہاز ایران کی اجازت سے آبنائے ہرمز سے گزریں گے۔
پاسداران انقلاب نے ٹرمپ انتظامیہ کی فیصلہ سازی کی صلاحیت پر سوال اٹھایا، ترجمان پاسداران کا کہنا ہے صدر ٹرمپ کو ناممکن فوجی کارروائی اور ایک تلخ معاہدے میں سے کسی ایک کا انتخاب کرنا ہوگا۔
ایرانی سپریم لیڈر کے مشیر محسن رضائی نے بھی امریکا کو آڑے ہاتھوں لیا، کہتے ہیں امریکی قزاقوں کے لیے آبنائے ہرمز کو قبرستان بنا دیں گے۔
