اسلام آباد میں تجاوزات کے خلاف آپریشن میں میریٹ اور ایوب چوک کے قریب گرین بیلٹ پر قائم ایف سی کیمپ آفس بھی مسمار کردیا گیا۔ وفاقی وزیر داخلہ محسن نقوی نے تجاوزات کے خلاف بلا تفریق کارروائی جاری رکھنے کا اعلان کیا ہے۔
انسداد تجاوزات آپریشن وفاقی وزیر داخلہ محسن نقوی کی زیر نگرانی کیا گیا، جنہوں نے واضح کیا کہ شہر میں بلا تفریق کارروائی جاری رہے گی اور کسی قسم کا دباؤ قبول نہیں کیا جائے گا۔
محسن نقوی کا کہنا تھا کہ غیرقانونی تعمیرات کے خلاف زیرو ٹالرنس پالیسی اپنائی گئی ہے اور سرکاری اراضی پر کسی بھی ادارے یا فرد کو قبضے کی اجازت نہیں دی جائے گی۔ انہوں نے یقین دہانی کرائی کہ ایف سی کیمپ آفس کے لیے متبادل جگہ فراہم کی جائے گی۔
وزیر داخلہ کے مطابق اسلام آباد کو اس کی اصل حالت میں بحال کرنا اور تجاوزات کا مکمل خاتمہ حکومت کی ترجیح ہے، جبکہ آپریشن کے دوران چیئرمین سی ڈی اے بھی ان کے ہمراہ موجود تھے۔
