مستونگ کے علاقے دشت میں مشترکا آپریشن کے دوران دہشت گردوں سے فائرنگ کے تبادلے میں ایک اہلکار شہید جبکہ 6 زخمی ہوگئے۔
کاؤنٹر ٹیررازم ڈیپارٹمنٹ حکام کے مطابق آپریشن دہشت گردوں کی موجودگی کی خفیہ اطلاع پر کیا گیا، جس میں سی ٹی ڈی اور پولیس کی ٹیموں نے حصہ لیا۔ کارروائی کے دوران دہشت گردوں اور سیکیورٹی اہلکاروں کے درمیان شدید فائرنگ کا تبادلہ ہوا جس کے نتیجے میں ایک اہلکار شہید جبکہ سی ٹی ڈی کے سب انسپکٹر سمیت 6 اہلکار زخمی ہوگئے۔
زخمیوں میں سب انسپکٹر جاوید گل، کانسٹیبل نوراللہ، کانسٹیبل عبدالعلیم اور تاج شامل ہیں جنہیں فوری طور پر اسپتال منتقل کر دیا گیا۔ سیکیورٹی فورسز کی مؤثر کارروائی کے نتیجے میں دہشت گرد پسپا ہو کر قریبی پہاڑی علاقوں میں فرار ہوگئے، جبکہ علاقے میں سرچ آپریشن جاری ہے۔
ڈی آئی جی سی ٹی ڈی اعتزاز گورایہ کا کہنا ہے کہ دہشت گردوں کے خلاف کارروائیاں جاری رہیں گی اور ان کے خاتمے تک آپریشنز کا سلسلہ نہیں رکے گا۔ سیکیورٹی فورسز ہر قسم کی دہشت گردی کا ڈٹ کر مقابلہ کر رہی ہیں اور صوبے میں امن کے قیام کے لیے پر عزم ہیں۔
