پیٹرولیم مصنوعات کی قیمتوں میں اضافے کے بعد کوئٹہ سے ملک بھر کے گڈز ٹرانسپورٹ کرایوں میں بڑا اضافہ ہوگیا۔ ملک بھر کے روٹس پر کرایوں میں 60 سے 70 فیصد تک اضافہ کردیا گیا۔
پیٹرولیم مصنوعات کی قیمتوں میں اضافے کے بعد کوئٹہ سے ملک کے مختلف شہروں تک گڈز ٹرانسپورٹ کے کرایوں میں نمایاں اضافہ ہوگیا۔ کوئٹہ سے کراچی روٹ کا کرایہ ایک لاکھ 20 ہزار سے بڑھ کر دو سے ڈھائی لاکھ روپے تک پہنچ گیا۔
کوئٹہ سے لاہور کا کرایہ 3 لاکھ 50 ہزار سے بڑھ کر 5 لاکھ روپے، کوئٹہ سے اسلام آباد کا کرایہ ڈھائی لاکھ سے بڑھ کر 5 لاکھ روپے جبکہ ملتان اور فیصل آباد روٹس پر بھی کرایوں میں نمایاں اضافہ کیا گیا۔
کرایوں میں اضافے کے اثرات عام شہریوں تک بھی پہنچنے لگے ہیں جہاں اشیائے ضروریہ کی قیمتوں میں مزید اضافے کا خدشہ ظاہر کیا جا رہا ہے جس سے شہری تشویش میں مبتلا ہو گئے۔
بڑھتے ہوئے ٹرانسپورٹ کرایوں نے نہ صرف کاروبار کو متاثر کیا ہے بلکہ یہ شہریوں پر بھی براہِ راست اثر انداز ہو رہے ہیں، اگر یہی صورتحال برقرار رہی تو مہنگائی کا ایک نیا طوفان شہریوں کا منتظر ہے۔
