پاکستان میں تعینات سعودی سفیر نواف بن سعیدالمالکی کا کہنا ہے کہ سعودی عرب اور دیگر خلیجی ممالک پر ایرانی حملےتشویشناک ہیں۔ پاکستان کی ثالثی کی کوششوں کو سراہتے ہیں۔
سعودی سفیر نواف بن سعیدالمالکی نے اپنے ویڈیو پیغام میں کہا ایرانی حملوں میں رہائشی علاقوں،ہوائی اڈوں اور شہری تنصیبات کو نشانہ بنایا گیا،افسوسناک حملوں کے نتیجے میں شہری جانوں کا ضیاع ہوا ۔
سعودی سفیر نے کہا ایرانی حملے خودمختار ریاستوں کے خلاف بلا جواز جارحیت ہیں،جو کسی بھی تنازع کا حصہ نہیں۔ حملےبین الاقوامی قانون اور اقوام متحدہ کےمنشور کے اصولوں کی کھلی خلاف ورزی ہیں،رہائشی علاقوں،ہوائی اڈوں اورشہری تنصیبات کونشانہ بنایاگیا،جو ان خلاف ورزیوں کی سنگینی کو واضح کرتا ہے۔
نواف بن سعیدالمالکی کا کہنا تھا کہ خطرات آبنائے ہرمز تک پھیلنا تشویشناک بات ہے،آبنائے ہرمز سے معیشت کا استحکام اورتوانائی کی سلامتی وابستہ ہے ،یہاں خطرہ صرف علاقائی نہیں رہتا بلکہ عالمی انسانی مسئلہ بن جاتا ہے،عوام کی زندگیوں اور ان کے استحکام اور ترقی کے حقوق کو متاثر کرتا ہے۔
