برطانوی کابینہ کے ایک وزیر کا کہنا ہے کہ اسرائیل کے اس دعوے کو ثابت کرنے کے لیے کوئی شواہد نہیں ملے کہ ایران کے پاس طویل فاصلے تک مار کرنے والے ایسے میزائل ہیں جو لندن تک پہنچنے کی صلاحیت رکھتے ہیں۔
ہاؤسنگ سیکرٹری سٹیو ریڈ نے بتایا کہ ایسے کوئی شواہد نہیں کہ ایران برطانیہ کو نشانہ بنا رہا ہے یا اگر وہ چاہیں تو ایسا کر سکتے ہیں تاہم انہوں نے یہ بتانے سے انکار کر دیا کہ یہ میزائل برطانوی سرزمین کے کتنے قریب پہنچے تھے۔ ان کا کہنا ہے کہ وہ ’آپریشنل تفصیلات‘ شیئر نہیں کر سکتے۔
واضح رہے کہ اسرائیلی فوج نے دعویٰ کیا تھا کہ تہران کے پاس ایسے ہتھیار ہیں جو 4,000 کلومیٹر تک مار کر سکتے ہیں۔ یہ دعویٰ ایران کی جانب سے بحر ہند میں ڈیاگو گارشیا پر امریکہ اور برطانیہ کے مشترکہ فوجی اڈے کو نشانہ بنائے جانے کے بعد سامنے آیا تھا۔ یہ جزائر ایران سے تقریباً 3,800 کلومیٹر دور ہیں۔
