حج آپریشن کو جدید تقاضوں سے ہم آہنگ اور مکمل طور پر ڈیجیٹل بنانے کے لیے اہم قدم اٹھاتے ہوئے وزارت مذہبی امور اور وزارت آئی ٹی درمیان مفاہمت کی یادداشت (ایم او یو) پر دستخط کر دیے گئے۔
مفاہمت کی یادداشت کے تحت پاک حج موبائل ایپ کو مزید بہتر، مؤثر اور صارف دوست بنایا جائے گا ۔ تقریب میں وزیر مذہبی امور سردار یوسف اور وفاقی وزیر آئی ٹی شزا فاطمہ نے بھی شرکت کی۔
سردار یوسف نے کہا کہ وزیراعظم کی ہدایات پر حج آپریشن کو مزید شفاف اور سہل بنایا جا رہا ہے، ڈیجیٹل نظام کے نفاذ سے غیر ضروری تاخیر اور انسانی غلطیوں کا خاتمہ ممکن ہوگا۔ انہوں نے کہا کہ اس اقدام سے بین الاقوامی معیار کے اہداف کے حصول میں بھی مدد ملے گی۔
وفاقی وزیر آئی ٹی شزا فاطمہ کا کہنا تھا کہ آئندہ سال حج درخواست سے لے کر وطن واپسی تک مکمل اینڈ ٹو اینڈ ڈیجیٹل نظام متعارف کرایا جائے گا۔ انہوں نے بتایا کہ درخواست گزاروں کے لیے سادہ اور آسان فہم آن لائن حج پورٹل بھی قائم کیا جائے گا.
