سپریم کورٹ نے جائیداد کی ملکیت اور تقسیم کے تنازع میں خیبرپختونخوا حکومت اور محتسب کی اپیلیں ناقابل سماعت قرار دے کر خارج کردیں۔ عدالت نے قرار دیا کہ جب نجی فریقین خود خاموش ہیں تو حکومت اور محتسب کو اپیل کا حق حاصل نہیں۔
سپریم کورٹ کی جانب سے جسٹس مسرت ہلالی کے تحریر کردہ فیصلے میں قرار دیا گیا ہے کہ محتسب ایک منصف اور نیم عدالتی ادارہ ہے، فریق نہیں۔ اس لیے وہ اعلیٰ عدالتوں میں اپنے فیصلوں کی وکالت نہیں کر سکتا۔
عدالت نے مزید کہا کہ خیبرپختونخوا حکومت نہ تو اس جائیداد کی وارث تھی اور نہ ہی فیصلے سے اسے کوئی ذاتی نقصان پہنچا۔ اس لیے حکومت اور محتسب کو اپیل دائر کرنے کا کوئی قانونی حق حاصل نہیں۔فیصلے میں واضح کیا گیا کہ اگر جائیداد کے اصل دعویدار اپیل کرنا چاہیں تو ان کا حق متاثر نہیں ہوگا۔
