لاہور کے علاقے گلبرگ میں ایم ایم عالم روڈ پر واقع ایک نجی پلازہ کی لفٹ میں آٹھ افراد پھنس گئے، جنہیں ریسکیو اہلکاروں نے بروقت کارروائی کرتے ہوئے بحفاظت نکال لیا۔
ترجمان ریسکیو کے مطابق لفٹ میں افراد کے پھنسنے کی اطلاع ملتے ہی ٹیم فوری طور پر موقع پر پہنچ گئی اور امدادی آپریشن کا آغاز کیا گیا۔ ریسکیو اہلکاروں نے پیشہ ورانہ مہارت کا مظاہرہ کرتے ہوئے لفٹ میں ٹریپ تمام افراد کو محفوظ طریقے سے باہر نکال لیا۔
ترجمان کے مطابق لفٹ میں پھنسے افراد میں خواتین اور بچے بھی شامل تھے۔ خوش قسمتی سے کسی کے زخمی ہونے کی اطلاع موصول نہیں ہوئی۔
ریسکیو حکام کا کہنا ہے کہ آپریشن کامیابی سے مکمل کرلیا گیا ہے جبکہ لفٹ میں خرابی کی وجوہات جاننے کے لیے انتظامیہ کو ہدایات جاری کردی گئی ہیں۔
