قومی اسمبلی کی قائمہ کمیٹی برائے بین الصوبائی رابطہ نے قومی ہاکی ٹیم کے مسائل پر سخت نوٹس لے لیا۔ معاملے پر تفصیلی بریفنگ لینے کا اعلان کر دیا۔ کنوینر کمیٹی مہرین رزاق بھٹو نے کہا کہ قومی ٹیم کے ساتھ جو کچھ ہوا وہ بدقسمتی ہے، کمیٹی جائزہ لےگی کہ اس نااہلی کےاصل قصوروار کون ہیں۔
مہرین رزاق بھٹو کی کنوینر شپ میں ہونے والے اجلاس میں پاکستان ہاکی فیڈریشن کے عبوری صدر محی الدین وانی اور ڈی جی پاکستان سپورٹس بورڈ سمیت دیگر حکام نے شرکت کی۔ مہرین رزاق بھٹو نے کہا کہ قومی ہاکی ٹیم کے ساتھ جو کچھ ہوا وہ بدقسمتی ہے۔ ہمارے دل کرکٹ کی طرح ہاکی کے لیے بھی دھڑکتے ہیں۔ کمیٹی جائزہ لے گی کہ اس نااہلی کے اصل قصوروار کون ہیں۔ ہم اپنی کھیلوں کو تباہ کرنے پر تلے ہوئے ہیں۔
کمیٹی رکن خواجہ اظہار نے کہا کہ پاکستان سپورٹس بورڈ اور ہاکی فیڈریشن دونوں ہی ناکام ہو چکے ہیں۔ وزیراعظم سے ملاقات کرکے کمیٹی میں بھیجی گئی انکوائری رپورٹ پیش کی جائے۔ اجلاس میں پاکستان سپورٹس بورڈ کے منصوبوں پر بھی بریفنگ دی گئی۔ حکام نے بتایا کہ باٸیو میکنیکل لیب منصوبہ دوہزار چودہ میں شروع ہوا لیکن ابھی تک مکمل نہیں ہوسکا۔
