پاکستان لانگ رینج رائفل ایسوسی ایشن کے زیرِ اہتمام آل پاکستان محمد علی جناح اوپن لانگ رینج شوٹنگ چیمپئن شپ چیف آف آرمی اسٹاف کپ 2026 کا 7واں ایڈیشن 13 سے 15 فروری تک ملتان میں منعقد ہوا، جس میں ملک بھر سے ماہر نشانہ بازوں نے بھرپور شرکت کی۔
چیمپئن شپ میں چاروں صوبوں سے مجموعی طور پر 61 شوٹرز نے حصہ لیا جبکہ بلوچستان سے 15 رکنی دستہ بھی مقابلوں میں شریک ہوا۔ 300 سے 1000 گز تک کے آٹھ لانگ رینج رائفل میچز میں کھلاڑیوں نے مشکل موسمی حالات کے باوجود اعلیٰ مہارت کا مظاہرہ کیا۔
مختلف کیٹیگریز میں نمایاں کامیابیاں حاصل کی گئیں۔ فل ٹارگٹ رائفل ٹرافی لیفٹیننٹ کرنل جنید علی ذوالفقار نے اپنے نام کی، ایف فری اسٹائل اوپن ٹرافی میں ولید گل کامیاب رہے، ٹیکٹیکل میچ میں لیفٹیننٹ جنرل احسان گلریز فاتح قرار پائے جبکہ آئرن سائٹ رائفل میچ میں نور زمان نے پہلی پوزیشن حاصل کی۔
انفرادی مقابلوں میں 300 میٹر اسپورٹنگ رائفل میچ لیفٹیننٹ کرنل جنید علی ذوالفقار جبکہ 900 یارڈ ایف ٹی آر میچ لیفٹیننٹ جنرل احسن گلریز نے جیتا۔ 1000 یارڈ ایف ٹی آر کے پہلے میچ میں جنید وقاص اقبال کامیاب رہے، ایف ٹی آر میچ نمبر 2 میں لیفٹیننٹ کرنل جنید علی ذوالفقار نے میدان مارا، جبکہ 1000 یارڈ ایف اوپن میچز نمبر 1 اور 2 میں ولید احمد گل نے پہلی پوزیشن حاصل کی۔
لیفٹیننٹ کرنل جنید علی ذوالفقار نے ایف ٹی آر ایگریگیٹ جبکہ ولید احمد گل نے ایف اوپن 1000 گز اور ایف اوپن ایگریگیٹ میں نئے قومی ریکارڈ قائم کیے۔
اختتامی تقریب میں معزز مہمانوں اور شوٹنگ کمیونٹی کے سینئر نمائندگان نے نمایاں کارکردگی دکھانے والے شوٹرز میں تمغے اور ٹرافیاں تقسیم کیں۔ اس موقع پر پاکستان لانگ رینج رائفل ایسوسی ایشن نے ملک میں لانگ رینج رائفل شوٹنگ کے فروغ کے عزم کا اعادہ کیا۔
قومی لانگ رینج رائفل ٹیم اگست 2026 میں برطانیہ میں ہونے والی 7ویں ایف کلاس عالمی چیمپئن شپ میں حصہ لے گی۔
