افغانستان میں چھوڑا گیا امریکی اسلحہ پاکستان کے خلاف استعمال ہورہا ہے۔ امریکی ٹی وی سی این این کی تحقیقاتی رپورٹ میں پاکستان کے موقف کی تصدیق ہوگئی۔
سی این این کی رپورٹ کے مطابق افغانستان اب دنیا کی سب سے بڑی اسلحہ منڈی بن چکا ہے۔ دنیا بھر کے دہشت گرد اور باغی گروپ افغانستان سے امریکی اسلحہ لیتے ہیں۔ پاکستان کے خلاف بھی امریکا کا چھوڑا گیا اسلحہ استعمال ہوتا ہے۔
رپورٹ کے مطابق پاکستان میں دہشت گرد ایم سکسٹین، ایم فور رائفلیں اور ایم ٹو فورٹی نائن مشین گنز استعمال کرتے ہیں۔ رپورٹ کے مطابق کیڈٹ کالج وانا پر حالیہ خودکش حملے میں بھی امریکی اسلحہ استعمال کیا گیا۔
سی این این کی ٹیم کو دہشت گردوں سے ملنے والے سینکڑوں امریکی ساختہ ہتھیار دکھائے گئے۔ رائفلزپر لگی مہر کے مطابق بندوقیں امریکی ریاست ساوتھ کیرولائنا میں بنیں۔ رپورٹ میں کہا گیا کہ جب تک یہ اسلحہ گردش میں رہے گا۔ خطے کا امن خطرے میں ہوگا۔
