پاکستان اور یورپی یونین کے درمیان ٹی آر کیو اپورشنمنٹ معاہدہ طے پا گیا۔
پاکستان اور یورپی یونین نے ٹی آر کیو اپورشنمنٹ معاہدے پر باضابطہ طور پر دستخط کر دیے ہیں، جس کا مقصد برطانیہ کے یورپی یونین سے انخلا کے بعد دوطرفہ تجارت میں تسلسل اور قانونی استحکام کو یقینی بنانا ہے۔
برسلز میں منعقدہ تقریب سے خطاب کرتے ہوئے بیلجئیم میں پاکستان کے سفیر رحیم حیات قریشی نے کہا کہ یہ معاہدہ پاکستان اور یورپی یونین کے درمیان تکنیکی تعاون کو مضبوط بنانے، اقتصادی تعلقات کو گہرا کرنے اور کثیرالجہتی نظام تجارت سے وابستگی کا ایک اہم سنگِ میل ہے۔
رحیم حیات قریشی نے کہا کہ یہ معاہدہ نہ صرف موجودہ تجارتی انتظامات کے تسلسل کو برقرار رکھے گا بلکہ مستقبل میں پاکستان اور یورپی یونین کے درمیان قواعد پر مبنی عالمی تجارتی نظام کے تحت مزید تعاون کی راہ ہموار کرے گا۔
انہوں نے کہا کہ یورپی یونین پاکستان کا ایک اہم تجارتی شراکت دار ہے اور اس نوعیت کے معاہدے دونوں فریقین کے کاروباری حلقوں کے لیے اعتماد اور استحکام کا باعث بنیں گے۔
