پنجاب یونیورسٹی فیکلٹی آف کمپیوٹنگ اینڈ انفارمیشن ٹیکنالوجی (ایف سی آئی ٹی) کی میزبانی میں انٹرنیشنل کولیجیٹ پروگرامنگ کانٹیسٹ (آئی سی پی سی) کا انعقاد کیا گیا۔
انٹرنیشنل کولیجیٹ پروگرامنگ کانٹیسٹ پاکستان ریجن کا فائنل راؤنڈ ایک فروری 2026 کو کامیابی کے ساتھ منعقد کیا گیا۔ اس قومی سطح کے اہم تعلیمی مقابلے میں فیکلٹی آف کمپیوٹنگ اینڈ انفارمیشن ٹیکنالوجی پنجاب یونیورسٹی نے میجر اکیڈمک پارٹنر کے طور پر نہ صرف میزبانی بلکہ کوہوسٹنگ کی ذمہ داریاں بھی احسن طریقے سے نبھائیں۔
انٹرنیشنل کولیجیٹ پروگرامنگ کانٹیسٹ کا فائنل راؤنڈ ملک کے تین بڑے مراکز لاہور، کراچی اور گیکی میں بیک وقت منعقد ہوا، جس میں پاکستان کی صفِ اول کی جامعات سے تعلق رکھنے والی 90 ٹیموں نے شرکت کی۔ ان میں فاسٹ پنجاب یونیورسٹی، نسٹ، گیگی ، این ای ڈی، ورچوئل نیشنل یونیورسٹی کے تمام کیمپسز یونیورسٹی اور یونیورسٹی آف ایجوکیشن سمیت دیگر نمایاں ادارے شامل تھے۔
لاہور سائٹ پر مقابلے کا انعقاد پنجاب یونیورسٹی کے اولڈ کیمپس میں واقع پنجاب یونیورسٹی فیکلٹی آف کمپیوٹنگ اینڈ انفارمیشن ٹیکنالوجی میں کیا گیا، جہاں 31 جنوری کو شرکاء کی رجسٹریشن، موک راؤنڈ اور دیگر سرگرمیوں کے بعد 1 فروری کو فائنل مقابلہ ہوا۔ فائنل راؤنڈ کا آغاز صبح 9:30 بجے ہوا اور دوپہر 2 بجے تک جاری رہا، جس کے بعد اختتامی تقریب منعقد کی گئی۔
ایف سی آئی ٹی، پنجاب یونیورسٹی کی ٹیم "گیٹو" ن مقررہ وقت میں پانچ سوال حل کیے اور سلور میڈل حاصل کیا۔
اختتامی تقریب میں مہمانِ خصوصی، اساتذہ، منتظمین اور طلبہ نے شرکت کی۔ اس موقع پر انٹرنیشنل کولیجیٹ پروگرامنگ کانٹیسٹ جیسے عالمی معیار کے مقابلے کے انعقاد پر فیکلٹی آف کمپیوٹنگ اینڈ انفارمیشن ٹیکنالوجی اور پنجاب یونیورسٹی کی کاوشوں کو سراہا گیا۔
انتظامیہ کے مطابق انٹرنیشنل کولیجیٹ پروگرامنگ کانٹیسٹ پاکستان ریجنل فائنل کمپیوٹر سائنس اور پروگرامنگ کے شعبے میں نوجوان ٹیلنٹ کو اجاگر کرنے اور عالمی معیار کی مسابقتی صلاحیتوں کو فروغ دینے کی ایک اہم کوشش ہے۔
فیکلٹی آف کمپیوٹنگ اینڈ انفارمیشن ٹیکنالوجی پنجاب یونیورسٹی نے ایک بار پھر ثابت کیا کہ وہ آئی ٹی اور اکیڈمکس کے فروغ میں ہمیشہ پیش پیش رہا ہے۔
پنجاب یونیورسٹی اور فیکلٹی آف کمپیوٹنگ اینڈ انفارمیشن ٹیکنالوجی کی جانب سے تمام شریک جامعات، طلبہ اور منتظمین کا شکریہ ادا کرتے ہوئے اس عزم کا اظہار کیا گیا کہ آئندہ بھی ایسے تعلیمی اور تکنیکی ایونٹس کے انعقاد کے ذریعے پاکستان میں آئی ٹی ٹیلنٹ کو عالمی سطح پر متعارف کرایا جاتا رہے گا۔
