حکومت نے مختلف قومی بچت اسکیموں کی شرحِ منافع میں ردوبدل کر دیا ۔ نئی شرح کا اطلاق 23 جنوری سے ہوگا ۔ بعض اسکیموں میں منافع کم کیا گیا جبکہ چند اسکیموں کی شرح برقرار رکھی گئی ہے۔
نوٹیفکیشن کے مطابق اسپیشل سیونگز سرٹیفکیٹ پر سالانہ منافع 9.6 فیصد سے کم ہو کر 9.4 فیصد ہو گیا۔ ریگولر انکم سرٹیفکیٹ پر شرح منافع 10.2 فیصد سے کم ہو کر 9.96 فیصد کر دی گئی۔ تین ماہ کے شارٹ ٹرم سیونگز سرٹیفکیٹ پر منافع 10 فیصد کے بجائے 9.64 فیصد ملے گا۔
نوٹیفکیشن کے مطابق 6 ماہ کے شارٹ ٹرم سیونگز پر منافع کی شرح 9.9 فیصد سے کم ہو کر 9.56 فیصد ہو گئی۔ ڈیفنس سیونگز سرٹیفکیٹ پر مجموعی منافع میں بھی کمی کی گئی ہے۔ تاہم بہبود سیونگز سرٹیفکیٹ پر شرح منافع 12 فیصد پر برقرار ہے۔
پنشنرز بینیفٹ اکاؤنٹ پر 12 فیصد اور سیونگ اکاؤنٹ پر 9 فیصد منافع برقرار رکھا گیا ہے۔ سروا اسلامک اسکیموں پر بھی منافع کی شرح میں کوئی تبدیلی نہیں کی گئی۔
