رکن بلوچستان اسمبلی اور پارلیمانی سیکرٹری برائے اقلیتی امور سنجے کمار پنجوانی کو ڈاکوؤں نے لوٹ لیا ۔
تفصیلات کے مطابق واقعہ ضلع نصیرآباد میں تھانہ نوتال کی حدود میں پر پیش آیا، ڈاکو سنجے کمار اور انکے ساتھیوں کے موبائل فونز اور قیمتی سامان لوٹ کر فرار ہو گئے ۔
سنجے کمار کا کہناتھا کہ اقلیتی برادری کے افراد سے ملاقات اور مذہبی رسومات میں شرکت کے لیے گئے تھے، نوتال سے ایک سے دوکلومیٹر کے فاصلے پر مسلح افراد نے ہمیں روکا، سڑک کنارے ایک ویگن اور ایک گاڑی پہلے سے کھڑی تھی، ڈاکوؤں نے گاڑی کو گھیرلیا اور اسلحے کے زور پر سامان کا مطالبہ کیا، میرے محافظوں نے مسلح افراد کے ساتھ ہاتھا پائی اور مزاحمت کی، ممکنہ فائرنگ اور جانی نقصان کے خدشے کے پیش نظرمحافظوں کو مزاحمت سے روک دیا،ڈاکوؤں کی تعداد 12 سے 15 کے قریب تھی، ڈاکوؤں اور سیکیورٹی فورسز کے درمیان فائرنگ کا بھی تبادلہ ہوا،جس کے بعدوہ فرار ہوگئے۔
