وفاقی وزیر داخلہ محسن نقوی نے منی لانڈرنگ میں ملوث مافیا کے خلاف بھرپور کریک ڈاؤن کا حکم دیدیا۔ انسانی اسمگلنگ میں ملوث ایجنٹس اور جعلی ادویات مافیا کو بھی گرفت میں لانے کی ہدایت کر دی۔
وفاقی وزیر داخلہ محسن نقوی نے ایف آئی اے کراچی زون کا دورہ کیا اور منی لانڈرنگ مافیا کے خلاف بھرپور کارروائی کا حکم دیدیا۔ کہا کہ بڑے منی لانڈررز پر مضبوط ہاتھ ڈالا جائے اور ان کی پوری منی ٹریل بے نقاب کریں۔ حوالہ ہنڈی کسی صورت قابل برداشت نہیں ۔ رقوم کی غیرقانونی ترسیل کرنے والوں کے خلاف بلاامتیاز ایکشن نظر آنا چاہئے۔
محسن نقوی نے انسانی اسمگلنگ اور جعلی ادویات کا دھندہ کرنےوالوں کو بھی قانون کے شکنجے میں لانے کی ہدایت کردی۔ اجلاس سے خطاب کرتے ہوئے کہا معصوم لوگوں کو جھانسہ دے کر غیرقانونی طور پر بیرون ممالک بھجوانے والے رعایت کےمستحق نہیں ۔ کسی دباؤ میں آئے بغیر اس مافیا کے خلاف کارروائی کی جائے ۔ جعلی ادویات کا دھندہ کرنے والے انسانی زندگیوں سے کھیل رہے ہیں ۔ ان کو بھی قانون کی گرفت میں لایا جائے ۔
وفاقی وزیرداخلہ نے سوشل میڈیا پلیٹ فارم ایکس پر اہم پیغام میں بتایا کہ ایف آئی اے کے تمام زونل دفاتر میں پری ڈیپارچر سہولت ڈیسک قائم کر دیئےہیں۔ جو بین الاقوامی مسافروں کو امیگریشن طریقہ کار کےمتعلق رہنمائی اور مدد دیں گے ۔ پریشانی سے پاک سفر کو یقینی بنائیں گے۔ سہولت ڈیسک ہیلپ لائنز اور ای میل کے ذریعے قابل رسائی ۔ ان کی تفصیلات ہوائی اڈوں ، سرحدی مقامات اور ایف آئی اے کی ویب سائٹ پر بھی موجود ہیں۔
