صنعتی شعبے کی پیداوار میں بہتری کے آثار نمایاں ہونے لگے ہیں، موجودہ مالی سال کے ابتدائی چار ماہ میں بڑی صنعتوں کی گروتھ 5.02 فیصد رہی، آٹو موبائل سیکٹر میں سب سے زیادہ اضافہ ریکارڈ کیا گیا۔
وفاقی ادارہ شماریات کی رپورٹ کے مطابق موجودہ مالی سال کے پہلے چار ماہ میں پاکستان کی بڑی صنعتوں کی کارکردگی میں بہتری آئی ہے۔رپورٹ کے مطابق اکتوبر 2024 کے مقابلے میں اکتوبر 2025 میں صنعتی پیداوار میں 8.33 فیصد اضافہ ریکارڈ کیا گیا، جبکہ جولائی تا اکتوبر مجموعی گروتھ 5.02 فیصد رہی۔
آٹو موبائل سیکٹر کی پیداوار میں سب سے زیادہ 79 فیصد اضافہ ہوا، جبکہ چار ماہ کے دوران ٹرانسپورٹ کے دیگر سامان کی پیداوار 37.51 تک بڑھی، فٹبال سمیت دیگر اشیا کی پیداوار میں 28 فیصد اضافہ ہوا، پیٹرولیم مصنوعات 12.25 فیصد اور ربڑ ی مصنوعات کی پیداوار 12 فیصد تک بڑھی۔
منرل پروڈکٹس کی گروتھ 13.45 فیصد اور الیکٹرک سامان کی پیداوار 6.26 فیصد تک پہنچ گئی۔معیشت کے سب سے بڑے صنعتی شعبے ٹیکسٹائل کی پیداوار میں 1.58 فیصد اضافہ ریکارڈ کیا گیا، جبکہ فوڈ سیکٹر کی پیداوار میں چار ماہ کے دوران 5 فیصد سے زیادہ بہتری آئی۔
