فوجی عدالت نے لیفٹیننٹ جنرل (ر) فیض حمید کو 14 سال قید بامشقت کی سزا سنادی۔
پاک فوج کے شعبہ تعلقات عامہ (آئی ایس پی آر) کے مطابق 12 اگست2024کو پاکستان آرمی ایکٹ کے تحت فیض حمید کیخلاف کارروائی کا آغاز ہوا تھا۔ فیض حمید کے خلاف فیلڈ جنرل کورٹ مارشل کا عمل 15 ماہ جاری رہا، عدالت نے آج 11 دسمبر کو ملزم کو 14 سال قید بامشقت کی سزا سنائی۔
آئی ایس پی آر کے مطابق الزامات میں سیاسی سرگرمیوں میں ملوث اور آفیشل سیکرٹ ایکٹ کی خلاف ورزی شامل تھی، اختیارات اور سرکاری وسائل کا غلط استعمال، شہریوں کو ناجائز نقصان پہنچانے کا بھی الزام تھا۔ طویل اور تفصیلی قانونی کارروائی کے بعد تمام الزامات درست ثابت ہوئے۔
ترجمان پاک فوج کے مطابق فیلڈ جنرل کورٹ مارشل نے تمام قانونی تقاضے پورے کئے، ملزم کوپسند کی دفاعی ٹیم رکھنے سمیت مکمل قانونی حقوق دیئے گئے، مجرم کو متعلقہ فورم پر اپیل کرنے کا حق حاصل ہے۔
بیان میں مزید کہا گیا ہے کہ ملزم کے خلاف سیاسی عناصر کے ساتھ مل کر انتشار اور عدم استحکام پھیلانے سمیت دیگر معاملات الگ دیکھے جارہے ہیں۔
