پاکستان اور ترکیہ کے درمیان دفاع، مواصلات، ائیرو اسپیس، فوڈ، اور آٹو موبائل میں جوائنٹ وینچر پر اتفاق ہوگیا۔
دورہ پاکستان پر آئے ترکیہ کے برصا چیمبر کے 15 رکنی وفد کی وفاقی وزیرمواصلات عبدالعلیم خان سے تفصیلی ملاقات ہوئی ۔باہمی تعاون کے نئے راستوں پر جامع تبادلہ خیال کیا گیا۔
وفاقی وزیرمواصلات عبدالعلیم خان نے ترک وفد کا پرتپاک خیرمقدم کیا اور کہا کہ پاکستان اور ترکیہ نہ صرف مشکل وقت میں ایک دوسرے کے بہترین دوست ثابت ہوئے ہیں بلکہ دونوں ممالک دفاع اور مواصلات کے شعبوں میں اسٹریٹجک پارٹنر بھی ہیں۔
ملاقات کے دوران عبدالعلیم خان نے اس عزم کا اظہار کیا کہ اگر کبھی ضرورت پڑی تو ہر پاکستانی اپنے ترک بھائی کے ساتھ کندھے سے کندھا ملا کر کھڑا ہو گا۔ شرکاء نے بتایا کہ ترکیہ میں بھی "جیوے جیوے پاکستان" کا نغمہ جذبے سے گایا جاتا ہے، جو دونوں ممالک کے دلوں کے مضبوط رشتے کی علامت ہے۔
ملاقات کے دوران اسلام آباد-تہران-استنبول ریلوے ٹریک پر بھی بات چیت ہوئی، جس کے حوالے سے وفاقی وزیر نے بھرپور تعاون کی یقین دہانی کرائی۔ ملاقات میں ائیروسپیس، فوڈ، آٹوموبائل اور مینوفیکچرنگ کے شعبوں میں اشتراک بڑھانے پر بھی خصوصی گفتگو کی گئی۔
عبدالعلیم خان نے گزشتہ ڈیڑھ برس میں ترکیہ کے ساتھ دو طرفہ تعلقات کو حوصلہ افزا قرار دیتے ہوئے ترک کمپنیوں کی جانب سے یورپ کی طرز پر پاکستان میں جوائنٹ وینچر میں دلچسپی کا خیرمقدم کیا۔ ترک وفد نے وفاقی وزیر کو برصا کے دورے کی باضابطہ دعوت بھی دی جبکہ ملاقات میں بزنس ٹو گورنمنٹ تعاون کو مزید وسعت دینے کی تجویز بھی پیش کی گئی۔
