صدرِ مملکت آصف علی زرداری کا کہنا ہے کہ ہر فرد کی عزت، مساوات اور انصاف کا تحفظ ریاست کی بنیادی ترجیح ہے۔
انسانی حقوق کے عالمی دن پر صدرِ مملکت آصف علی زرداری نے اپنے پیغام میں کہا کہ مذہبِ اسلام انسانی وقار اور احترامِ انسانیت پر زور دیتا ہے جبکہ آئینِ پاکستان ہر شہری کو بلا امتیاز آزادی اور بنیادی حقوق کی ضمانت دیتا ہے۔
صدرِ مملکت نے کہا کہ حکومت انسانی حقوق کے فروغ کیلئے پُرعزم ہے اور کمزور و پسماندہ طبقات کے حقوق کیلئے مزید مؤثر اقدامات ضروری ہیں۔ انہوں نے خواتین، بچوں، اقلیتوں اور خصوصی افراد کو بااختیار بنانے کو ریاستی ذمہ داری قرار دیا جبکہ برداشت، باہمی احترام اور ہم آہنگی کے ماحول کو وقت کی ضرورت بتایا۔
ان کا کہنا تھا کہ سول سوسائٹی اور اداروں کا مشترکہ اقدار کے تحفظ میں اہم کردار ہے اور ملک میں انسانی حقوق کے فروغ کیلئے ہر فرد کو اپنا حصہ ڈالنا ہوگا۔ صدر نے اقوام متحدہ کو اس دن کے عالمی اہتمام پر خراجِ تحسین پیش کیا اور کہا کہ ہر پاکستانی کو خوف، جبر اور امتیاز سے پاک زندگی ملنی چاہیے۔
