وزیراعظم شہباز شریف نے کیش لیس معیشت کے حوالے سے اقدامات پر اطمینان کا اظہار کرتے ہوئے وضع کردہ اہداف معینہ مدت میں حاصل کرنے کی ہدایت کی ہے۔
وزیر اعظم محمد شہباز شریف کی زیر صدارت کیش لیس معیشت کے حوالے سے جاری اقدامات پر جائزہ اجلاس منعقد ہوا۔ اجلاس میں وفاقی وزراء احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، وزیر مملکت بلال اظہر کیانی، گورنر سٹیٹ بنک جمیل احمد، چیئرمین نادرا لیفٹینینٹ جنرل محمد منیر افسر، چیئرمین ایف بی آر راشد محمود لنگڑیال اور متعلقہ اعلی حکام نے شرکت کی۔
وزیراعظم نے اجلاس سے خطاب کرتے ہوئے کہا کہ معیشت کو کیش لیس کرنے کیلئے جاری اقدامات کا ملکی معیشت کی پائیدار ترقی میں کلیدی کردار ہو گا۔ انہوں نے ہدایت کی کہ مکمل طور پر کیش لیس معیشت اور غیر رسمی معیشت کے خاتمے کیلئے دیہی علاقوں میں آگاہی بڑھائی جائے،پوری دنیا ڈیجیٹل معیشت کی جانب تیزی سے گامزن ہے، پاکستان کو دنیا کے ساتھ قدم ملا کر چلنا ہوگا،روز اول سے پاکستان کو ڈیجیٹل نیشن بنانے کیلئے اقدامات کو ترجیح دی جس کے مثبت نتائج سامنے آرہے ہیں۔
وزیراعظم نے کہا کہ رمضان المبارک میں ملکی تاریخ میں پہلی مرتبہ مستحقین کو بینظیر انکم سپورٹ پروگرام کی رقوم ڈیجیٹل والٹس کے ذریعے بھیجی گئیں،کیش لیس معیشت کے ذریعے گورننس کی بہتری اور کرپشن میں خاطر خواہ کمی آئے گی۔
وزیراعظم نے ہدایت کی کہ کیش لیس معیشت کے وضع کردہ اہداف کا معینہ مدت میں حصول یقینی بنایا جائے۔ انہوں نے موجودہ پیش رفت کو اطمینان بخش قرار دیا اور وزارت خزانہ، وزارت انفارمیشن ٹیکنالوجی، ایف بی آر، سٹیٹ بنک اور متعلقہ اداروں کے کام کو سراہا۔اجلاس کو وزیراعظم کے کیش لیس معیشت کے وژن کے تحت حکومتی اقدامات پر پیش رفت سے آگاہ کرتے ہوئے بتایا گیا کہ بجلی اور گیس کے بلز پر راست کیوآر کوڈز کے ذریعےادائیگی کو کیش لیس کیا جارہا ہے جس کی بدولت اربوں روپے کے بلوں کی ادائیگی اب ڈیجیٹل نظام کے ذریعے ممکن ہوئی ہے۔
وزیر اعظم کو بینظیر انکم سپورٹ پروگرام کے تحت ایک کروڑ ڈیجیٹل والٹس پر پیش رفت سے بھی آگاہ کیا گیا۔اجلاس کو بتایا گیا کہ والٹس رواں ماہ کے اختتام تک مکمل طور پر فعال ہو جائیں گے اور مستحقین کو رقوم کی آئندہ قسط اسی کے ذریعے بھیجی جائے گی۔ اس کے علاوہ اسلام آباد میں سرکاری سروسز کے حصول کیلئے قائم موبائل ایپلی کیشن کو راست کے ساتھ جوڑ دیا گیا ہے اور ادائیگیاں اس کے ذریعے کی جارہی ہیں۔
اسلام آباد میں نئے کاروبار کھولنے کیلئے لائسنس کو ڈیجیٹل ادائیگیوں کے نظام کے ساتھ مشروط کیا گیا ہے اور موجودہ تمام دکانوں پر راست کیو آر کوڈز کے ذریعے ادائیگیوں کی سہولت فراہم کردی گئی ہے،ملک میں ڈیجیٹل بنکس کے قیام کیلئے لائسنس جاری کئے جارہے ہیں۔
اجلاس کو بتایا گیا کہ ان اقدامات سے اب تک ملک کی 68 فیصد آبادی کی فنانشل انکلوژن کرلی گئی ہے جبکہ آئندہ برس اس میں مزید اضافہ کیا جائے گا۔وزیراعظم نے ہدایت کی کہ مالی شمولیت کا دائرہ کار مزید بڑھایا جائے۔اجلاس کو آئندہ برس کے اہداف کے حوالے سے بھی بریفنگ دی گئی۔ وزیراعظم نے کیش لیس معیشت کے حوالے سے اقدامات کی پیش رفت پر اطمینان کا اظہار کرتے ہوئے وضع کردہ اہداف کو معینہ مدت میں پورا کرنے کی ہدایت کی۔
