جنوبی امریکی ملک ایکواڈور میں واقع جیل میں خوفناک ہنگامہ آرائی اور بھگدڑ سے 31 قیدی ہلاک ہوگئے۔
خبر ایجنسی نے انتظامیہ کے حوالے سے لکھا کہ 27 قیدیوں کی موت دم گھٹنے کے باعث ہوئی جبکہ 4 کو گولیاں لگیں ۔ 33 افراد زخمی ہیں جنہیں اسپتال منتقل کردیا گیا۔
رپورٹ کے مطابق جیل کے اندر سے فائرنگ، دھماکوں کی آوازیں آتی رہیں، واقعے کی تحقیقات کیلئے فرانزک ٹیم موقع پر پہنچ گئی۔
واضح رہے کہ ایکواڈور میں حالیہ برسوں کے دوران جیلوں میں پُرتشدد فسادات معمول بن چکے ہیں، جس میں اب تک سیکڑوں قیدی اپنی جانیں گنوا چکے ہیں۔ ملک بھر میں جیلوں کے اندر طاقت کے حصول کی جنگ نے صورتِ حال کو مزید خطرناک بنا دیا ہے۔
حکام کا کہنا ہے کہ ایکواڈور کی جیلیں رکنے کی گنجائش سے کہیں زیادہ قیدیوں سے بھری ہوئی ہیں اور گینگز کے درمیان منشیات کی اسمگلنگ اور طاقت کے تنازع نے انہیں جنگی میدان میں تبدیل کر دیا ہے۔
