مسلسل 5 ہفتوں سے بڑھتی ہوئی مہنگائی کی لہر کو بریک لگ گئی، ہفتہ وار مہنگائی کی شرح میں 0.59 فیصد کی کمی ریکارڈ کی گئی ہے ، وفاقی ادارہ شماریات نے مہنگائی کے ہفتہ وار اعداد و شمار جاری کردیئے ہیں جن کے مطابق ایک ہفتے میں 18 اشیائے ضروریہ مہنگی،12 کی قیمتوں میں کمی آئی۔
تفصیلات کے مطابق ہفتہ وار مہنگائی کی مجموعی سالانہ شرح 4 اعشاریہ 18 فیصد پر آگئی، ایک ہفتے میں 18 اشیائے ضروریہ مہنگی،12 کی قیمتوں میں کمی آئی، ایک ہفتے میں انڈے 8 روپے 33 پیسے فی درجن مزید مہنگے ہوئے، بڑا گوشت 10 روپے 66 پیسے،چھوٹا گوشت 2 روپے 52 پیسے فی کلو مہنگا ہوا، جلانے والی لکڑی 22 روپے 56 پیسے فی من مہنگی ہوئی۔
گزشتہ ہفتے کے دوران کیلے 2 روپے86 پیسےفی درجن ، ایک ہفتے میں 20 کلو آٹے کا تھیلا 7 روپے 39 پیسے مہنگا ہوا، آٹے کے تھیلے کی اوسط قیمت 2195 روپے 81 پیسے تک پہنچ گئی، ایک ہفتے میں اڑھائی کلو گھی کا ٹن 2 روپے 37 پیسے مہنگا ہوا، گزشتہ ہفتے ٹماٹر فی کلو 66 روپے 21 پیسے ، پیاز 8 روپے 49 پیسے فی کلو ، لہسن 13 روپے، زندہ مرغی 2 روپے 21 پیسے فی کلو سستی ہوئی، چینی، دال مسور،دال ماش، دال چنا اور آلو بھی سستی ہونے والی اشیاء میں شامل ہیں ۔ایک ہفتے کے دوران 21 اشیاء کی قیمتوں میں استحکام رہا۔
