پاکستان کی جانب سے مقبوضہ مغربی کنارے پر اسرائیلی خودمختاری بڑھانے کے اقدام کی شدید مذمت کی گئی ہے۔ دفتر خارجہ کا کہنا ہے کہ یہ اقدام عالمی قوانین، سلامتی کونسل کی قراردادوں اور فلسطینی عوام کے ناقابلِ تنسیخ حقوق کی صریح خلاف ورزی ہے۔
ترجمان دفتر خارجہ کے مطابق قابض طاقت کی مقننہ میں پیش کردہ مسودہ قانون کے ذریعے اسرائیل نے مقبوضہ مغربی کنارے کے بعض حصوں پر نام نہاد خودمختاری بڑھانے کی کوشش کی۔ پاکستان نے عالمی برادری سے مطالبہ کیا ہے کہ وہ اسرائیل کے غیر قانونی اقدامات کو روکنے اور قابض افواج کو بین الاقوامی قوانین کی خلاف ورزیوں پر جوابدہ ٹھہرانے کے لیے فوری اور مؤثر کارروائی کرے۔
پاکستان نے واضح کیا کہ ایسے اشتعال انگیز اقدامات خطے میں امن و استحکام کے قیام کی کوششوں کو نقصان پہنچاتے ہیں۔دفتر خارجہ نے اس عزم کا اعادہ کیا کہ پاکستان علاقائی اور عالمی شراکت داروں کے ساتھ مل کر فلسطینی عوام کے جائز حقوق کے تحفظ اور حقِ خودارادیت کے لیے اپنا کردار ادا کرتا رہے گا۔
پاکستان نے ایک بار پھر 1967 سے پہلے کی سرحدوں پر مبنی آزاد، خودمختار اور قابلِ عمل ریاستِ فلسطین کے قیام اور اس کے دارالحکومت القدس الشریف کی غیر متزلزل حمایت کا اعادہ کیا۔
