رواں مالی سال کے پہلے دو ماہ کےدوران غیرملکی درآمدات میں نمایاں اضافہ ریکارڈ کیا گیا،تجارتی خسارہ 6 ارب ڈالر سے تجاوز کرگیا۔
مالی سال 2025-26 کےپہلے 2ماہ کےدوران درآمدات میں اضافے سےتجارتی خسارہ 29.63 فیصد بڑھ گیا، گزشتہ سال جولائی اگست میں 4.66 ارب ڈالر کےمقابلےمیں تجارتی خسارہ 6 ارب ڈالر سے تجاوز کرگیا۔
ادارہ شماریات کی رپورٹ کےمطابق دوماہ میں مجموعی درآمدات 14.53 فیصد بڑھیں اور11 ارب ڈالر تک جاپہنچیں،غذائی اشیاکی امپورٹس 39کروڑ 47 لاکھ ڈالراضافے سے 1 ارب 46 کروڑ ڈالر ریکارڈ کی گئیں۔
رپورٹ کے مطابق جولائی تا اگست دودھ،مکھن،کریم،خشک میوے،مصالحہ جات،دالوں،سویابین اور پام آئل کی درآمد میں بھی اضافہ ہوا،پام آئل کی امپورٹ پر 64 کروڑ ڈالر زرمبادلہ خرچ ہوا،موبائل فونز کی امپورٹ میں 2 گنا سےزیادہ اضافہ ریکارڈکیاگیا،2 ماہ میں اسمارٹ فون کی درآمدات پر30 کروڑ ڈالر کے اخراجات آئے،گزشتہ برس یہ رقم 14 کروڑ 37 لاکھ ڈالرتھی،جولائی تا اگست کاروں، بسوں،موٹر سائیکلز کی درآمد میں بھی دو گنا بڑھیں،ٹرانسپورٹ کی امپورٹ کا بل 62کروڑ58 لاکھ ڈالرسے تجاوز کرگیا۔
رپورٹ کےمطابق مشینری کی امپورٹ 22.56 فیصد اضافے کےساتھ 1 ارب 70 کروڑ ڈالرتک پہنچ گئی۔ ٹیکسٹائل سیکٹرکی درآمدات 7.49 فیصد اضافےسے1 ارب ڈالررہیں،زرعی آلات،کیمکلزکی امپورٹ 4.58 فیصد بڑھ کر 1 ارب 75 کروڑ ڈالر،لوہے،اسٹیل، ایلومونیم سمیت 1 ارب ڈالرکی مختلف دھاتیں بھی امپورٹ کی گئیں ۔
البتہ چائےکی درآمد میں 5.67 فیصد اور چینی کی درآمد میں 19.48 فیصد کمی آئی،پیٹرولیم کی درآمد 4.65 فیصد کمی سے 2ارب 53 کروڑ ڈالر رہی
