گجرات میں ایک طرف بارش کا پانی جمع تو دوسری طرف سیلابی پانی نے بھی شہر میں داخل ہو کر تباہی مچا دی۔
گجرات میں 526 ملی میٹربارش کےبعد سیلابی پانی نےبھی تباہی مچا دی،گردونواح کے 6 برساتی نالے بپھرنے سےجہاں متعدد دیہات زیرآب آئے وہاں اب یہ سیلابی ریلےگجرات شہر کے اندر بھی داخل ہوچکے ہیں، سیلابی ریلوں نےکچہری چوک اوراس کےملحقہ علاقوں شہر کے اہم تجارتی مراکز کورٹ روڈ اور مسلم بازار کو بھی اپنی لپیٹ میں لے لیا ہے۔
رات گئے تاجروں نےاپنی مدد آپ کےتحت دوکانوں میں موجود اپنا قیمتی سامان محفوظ مقامات پر منتقل کیا،اس دوران ضلعی انتظامیہ اورمیونسپل کارپوریشن کا عملہ کہیں نظر نہ آیا جبکہ سیلابی پانی متعدد علاقوں میں گھروں میں بھی داخل ہو گیا،شہریوں اور تاجروں نے انتظامی غفلت اورناقص اقدمات پر وزیر اعلیٰ پنجاب سے سخت نوٹس کا مطالبہ کیا ہے۔
