مشیر خزانہ خرم شہزاد نے دعویٰ کیا ہے کہ پاکستان نے ملکی تاریخ میں پہلی بار قبل از وقت 2600 ارب روپے کا قرضہ اتار دیا جس سے مالیاتی استحکام اور سرمایہ کاروں کا اعتماد مضبوط ہوا ہے۔
سماجی رابطے کے پلیٹ فارم ایکس پر جاری اپنے بیان میں مشیر خزانہ کا کہنا تھا کہ وزارتِ خزانہ نے صرف 59 دن میں اسٹیٹ بینک کا 1633 ارب روپے قرضہ چکایا اور جون میں 500 ارب اور اگست میں 1133 ارب روپے قبل از وقت واپس کیے گئے۔
کمرشل مارکیٹ سے بھی ایک ہزار ارب روپے کا قرض 2025 کی پہلی ششماہی میں ادا کیا گیا۔
مشیر خزانہ خرم شہزاد کے مطابق مجموعی طور پر ایک سال سے بھی کم عرصے میں 2600 ارب روپے کا قرض ادا کیا گیا ہے جس سے مالیاتی استحکام اور سرمایہ کاروں کا اعتماد مضبوط ہوا۔
اسٹیٹ بینک کا قرضہ ساڑھے پانچ ٹریلین سے کم ہو کر تین اعشاریہ آٹھ ٹریلین رہ گیا اور قرضوں کی اوسط مدت بھی دو اعشاریہ سات سال سے بڑھ کر تین اعشاریہ آٹھ سال ہوگئی جو ملکی تاریخ میں سب سے بڑی بہتری ہے۔
