راولپنڈی میں پاکستان آئل فیلڈ کی لائن سے خام تیل چوری کرنے کی بڑی واردات پکڑی گئی۔ 10 انچ قطر کی پائپ لائن پر کلپ لگا کر پائپ کے ذریعے زیر زمین ٹینکر میں کروڈ آئل بھرا جارہا تھا، مجموعی طور پر 25 کروڑ 48 لاکھ 81 ہزار روپے سے زائدمالیت کا کروڈ آئل چوری ہوا۔ پولیس نے مقدمہ درج کرکےتحقیقات شروع کردی ہے۔
دھمیال پولیس نے سینئر ایگزیکٹو ایڈمن شاہد احمد کی مدعیت میں کروڈ آئل چوری کا مقدمہ درج کرلیا۔ متن مقدمہ کے مطابق کچھ عرصہ سے آئیل لائنوں پر پنڈ فتح سے مورگاہ تک نا معلوم مقام سے آئل چوری ہونے کی اطلاع تھی، پٹرولنگ سپر وائزر نے فون پر اطلاع دی رنیال گاؤں کے نزدیک ایک گھر میں آتشزدگی اور کالے دھوئیں کی اطلاع ہے،موقع پر پہنچے جہاں ڈمپر نما گاڑی میں ٹینک بنا کر اوپر بجری ڈالی گئی تھی جو آگ کی لپیٹ میں تھا، گھر میں دو ٹینک بناکر کروڈ آئل چوری کیا جا رہا تھا۔
گھر سے شرافت علی، محمد بلال کے شناختی کارڈ، پسٹل اور گولیاں برآمد ہوئیں، شرافت علی،محمد بلال کے ساتھ سہولت کار محمد واجد ، شیر خان اور فضل شیر خان کو ملزم نامزد کر دیئے گئے ہیں جبکہ پولیس نے دو ملزمان کو گرفتار کرکے تفتیش شروع کردی ہے۔ کمپنی کی نقصانات رپورٹ کے مطابق 12821 بیرل کروڈ آئل چوری کیا گیا تھا۔
